Pothuajse 6 milionë euro pasuri i ka sekuestruar Guardia di Finanza e Brescias shqiptarit Gëzim Sallaku, biznesmenit të njohur, i cili në të kaluarën kishte qenë edhe president i klubit të futbollit Darfo. Përfunduan hetimet paraprake edhe për 69 persona të tjerë. Më konkretisht bëhet fjalë për një pasuri me vlerë mbi 5.8 milionë euro që i është sekuestruar shqiptarit Gëzim Sallaku, i dëbuar nga vendi fqinj më shkurt të vitit 2021 si person i padëshiruar dhe i rrezikshëm. Mediat italiane shkruajnë se biznesmeni shqiptar, është në qendër të disa hetimeve.
Policia Financiare e Brescias ka vendosur sekuestrimin preventiv të pasurive të paluajtshme dhe të luajtshme deri në shumën mbi 5.8 milionë euro, pasi e konsideron si person me precedentë të ndryshëm penalë.
Në sekuestrim janë edhe vila në Sale Marasino dhe hotel Villa Kinzica, që i atribuohet Sallakut. Në të njëjtën kohë, policia gjyqësore ka kryer kontrolle në shtëpi. Gëzim Sallaku po hetohet si pjesë e një hetimi më të gjerë ku përfshiehn 69 persona të akuzuar për “trafik ndërkombëtar droge” dhe “pastrim parash”.
