Ministrja e Financave, Delina Ibrahimaj, në një konferencë për mediat me përfaqësues të misionit të FMN dhe guvernatorin e BSH, Gent Sejko, ka folur për situatën ekonomike. Ibrahimaj tha se gjasat për recesion të ekonomisë sonë vitin e ardhshëm duken të ulëta, por do të jenë vigjilentë për çdo skenar dhe kanë plane alternative përshtatjeje.
“Pritjet për rritjen ekonomike në tre mujorin e katërt mbeten të rrethuara me pasiguri të larta, në varësi se si do të shkojnë zhvillimet ekonomike ndërkombëtare. Një ngadalësim i rritjes ekonomike ka të ngjarë të ndodhë në tre mujorin e fundit të vitit, për shkak të pasigurive të rritura.
Prandaj sa i përket rritjes ekonomike për 2022, Ministria e Financave ka parashikuar të rrisë për lartë projeksionin nga 3.7 në 3.2% që parashikohej në fillim të luftës.
Sa i takon rritjes ekonomike për vitin e ardhshëm, ne kemi rishikuar për poshtë parashikimin tonë të skenarit bazë në nivelin 2.6% nga mbi 3% që e kishim në rishikimin e mëparshëm.
Megjithatë nëse ndodh një skenar i plotë i recesionit të një pjesë të ekonomive të BE, ndoshta dhe rritja e vitit të ardhshëm mund të jetë me e ulët se 2%. Ka risqe pozitive që mund të çojnë në një skenar 3%. Megjithatë balanca totale e risqeve anon në kahun negativ.
Ndërkohë gjasat për një recension të ekonomisë tonë gjatë vitit tonë duken shumë të ulëta. Edhe pse një pjesë e ekonomive të BE mund të hyjnë në recesion ne do të mbajmë këtë nivel. Ne presim që borxhi publik të jetë nën 70% të GDP deri në fund të këtij viti nga 73.2% që ishte në fund të 2021”, tha ministrja.
