Ndërtimet pa leje ishte një temë të cilën e trajtoi sot kryeministri Rama, duke bërë përgjegjës prokurorët që mbyllin çështjet me para. Ndërtimet pa leje i konsideron një problem që duhet zgjidhur, dhe për këtë arsye qeveria ka miratuar ligjin për konfiskimin e objekteve shumëkatëshe që kanë metra pa leje. Në takimin me përfaqësues të biznesit për bilancin e sezonit turistik veror, kryeministri u shpreh se politika për të ndëshkuar ndërtimet pa leje do të bëhet akoma më e rreptë.
“Jemi ndjerë më shumë se një herë të turpëruar për faj të llumit që gëlon në sistemet e drejtësisë, dhe llumi në drejtësi bashkë me llumin në Policinë e Shtetit dhe inspektorate e ka shumë të lehtë të çojë me ndihmën e prokurorëve të zellshëm që kur vjen puna te ndërtuesit e mëdhenj, e mbyllin me para çështjen. Njerëz që kanë ndërtuar pa leje një gardh, një mur, gjysmë shtese në fshat, dhe raste flagrante janë bërë dhe publike.
Një kotec, një mur mbajtës, një avlli, dritaret e famshme të Bojken Lakos që të të nxjerrë dhe bojën botërisht, dhe e kanë të pamundur që të veprojnë ndaj kateve pa leje në mes të Tiranës që janë shumë më pak seç kanë qenë. Raporti është më shumë se sa 1 me 10.
Kur ne kemi nisur këtë betejë që nuk ka pasur pallat në Tiranë që kishte ndonjë metër pa leje. Mësimi që kemi nxjerrë është që këta me prokurorët e korruptuar e zgjidhin siç e zgjidhin, edhe ata që nga një anë Tatimet i çojnë në Prokurori për evazion dhe nga ana tjetër dalin pa lagur. Atëherë kjo është zgjidhja që ne kemi gjetur. Asnjë metër nuk do ta gëzojnë dot. Ka filluar dhe kontrolli përgjatë bregdetit”.
