Ngjarjet kriminale duket sikur nuk kanë fund. Një tjetër vrasje është shënuar në Shkodër, ku ka humbur jetën Ismet Çekorja.
58-vjeçari është qëlluar me armë zjarri rreth orës 14:50, dhe fatkeqësisht nuk ka mundur t’i mbijetojë plagëve. Ai ka shkuar i vdekur në spitalin e Shkodrës. Ngjarja ka ndodhur në afërsi të banesës së tij në lagjen “Kiras” në Shkodër.
Më datë 29 gusht, Ismet Çekorja nga Shkodra doli para mediave, duke kërkuar drejtësi për djalin e tij që është shpallur në kërkim për një atentat të dështuar.
E ndërsa sot u ekzekutua me armë zjarri në lagjen “Kiras” të Shkodrës, pranë ish-shkollës veterinare.
Çekorja u ekzekutua me armë zjarri në rrethana të paqarta. Në vendngjarje ka shkuar policia dhe ka rrethuar skenën e krimit, duke mbledhur provat që mund të çojnë në zbardhjen e dinamikës.
I ndjeri Ismet Çekorja është babai i Bajram Çekores, i cili është shpallur në kërkim nga Policia e Shkodrës si një nga autorët e atentatit të dështuar ndaj Alban Bruçit. Ismet Çekorja mohoi akuzat që rëndojnë ndaj djalit të tij, duke pretenduar se janë të gjitha inskenime.
