Rreth 21 prodhues verash dhe 11 shefa kuzhine nga Shqipëria do të marrin pjesë në Panairin Ndërkombëtar të verës “Wine Vision by Open Balkan”, që do të mbahet në Beograd në datat 01-04 shtator. Në vigjilje të këtij eventi, ministrja Frida Krifca mirëpriti pjesëmarrësIt në ambientet e Ministrisë së Bujqësisë dhe Zhvillimit Rural. Krifca tha se ky panair është një hapësirë e rëndësishme për të përçuar përtej kufijve edhe shijen shqiptare, pasi përpos tregtimit të produktit të verës, shefat e kuzhinës nga Shqipëria do të gatuajnë me produkte bio të vendit të siguruara nga fermerët shqiptarë.
Ky është panairi i parë që po organizohet nga vendet partnere dhe themeluese të nismës “Ballkani i Hapur”- Shqipëria, Serbia dhe Maqedonia e Veriut, dhe përbën një mundësi ideale për prodhuesit e verës dhe kantinat nga i gjithë rajoni, që të prezantohen përpara një audience më të gjerë.
Në fjalën e saj, ministrja e cilësoi sektorin e vreshtarisë ndër më të rëndësishmit, duke bërë gjithashtu me dije punën që po bëhet për formalizimin e sektorit me ligjin e vreshtarisë, i cili pritet të dërgohet në Parlament brenda muajit shtator.
Me synimin për të mirëpritur sa më shumë kantina që do të marrin pjesë në “Wine Vision by Open Balkan 2022”, e për të shkëmbyer sa më shumë ekperienca, panari do të ketë një program të pasur që përfshin Trofeun e Verës së “Ballkanit të Hapur 2022”, master klasa, diskutime mbi potencialin e industrisë së verës në Ballkan, takime B2B, që do t’ju japi mundësi pjesëmarrësve të forcojnë kontaktet ekzistuese, por edhe të krijojnë network të ri.
Panairi do të përfshijë opsione shitjeje, jo vetëm përmbajtje ekspozite, dhe vizitorët dhe njohësit do të kenë mundësinë të blejnë verëra të përzgjedhura dhe të takojnë pronarët e kantinave.
