Dymbëdhjetë persona kanë vdekur, pasi një autobus që transportonte turistë polakë doli nga rruga në Kroaci të shtunën. Të 31 pasagjerët e mbijetuar janë plagosur, me disa që luftojnë për jetën në spital, thanë zyrtarët.
Pasagjerët ishin të gjithë të rritur dhe të gjithë shtetas polakë, tha Ministria e Jashtme polake për mediat lokale.
Ata po udhëtonin për në Medjugorje, një faltore katolike në Bosnje, kur aksidenti ndodhi rreth orës 05:40 me orën lokale. Autobusi doli nga rruga A4 midis Jarek Bisaskit dhe Podvorecit, në veri-lindje të Zagrebit.
Fillimisht u raportua se 11 persona kishin vdekur. Një person tjetër vdiq më vonë në spital, tha ministri i Brendshëm kroat Davor Bozinoviç.
“Disa nga pasagjerët e plagosur po luftojnë për jetën e tyre”, u tha Bozinoviç-gazetarëve.
Kryeministri kroat Andrej Plenkoviç shprehu ngushëllimet e tij për familjet e viktimave, duke shtuar në një postim në Twitter se shërbimet e urgjencës po bëjnë gjithçka që munden për të ndihmuar. Dy ministra polakë po udhëtojnë për në Kroaci pas aksidentit, njoftuan mediat lokale.
Burimi i lajmit: BBC. Përshtatur nga Tirana Today
