Zëvendësdrejtori i Policisë së Kosovës për rajonin e veriut, Besim Hoti, ka deklaruar se serbët nuk largojnë barrikadat dhe se pikat klufitare Jarinje dhe Bërnjak vijojnë të jenë të bllokuara. Besim Hoti pohoi për “Telegrafin” se pikat kufitare me Serbinë, Jarinje dhe Bërnjak po vazhdojnë të jenë të bllokuara nga serbët lokalë, të cilët që nga dje kanë vendosur barrikada në këto dy pikë kalime kufitare.
“Gjendja nuk ka ndryshuar. Barrikadat janë ende prezentë aty, por të shohim sot gjatë ditës se çfarë do të ndodhë pas vendimit që është marrë. Nuk ka pasur incidente gjatë natës”, u shpreh Hoti.
Serbët lokalë vendosën në rrugë kamionë dhe mjete të tjera të rënda, për të kundërshtuar dy vendime të Qeverisë së Kosovës që kanë të bëjnë me targat dhe dokumentet serbe.
Pas kësaj, Qeveria u zotua se do të shtyjë zbatimin e vendimeve për një muaj, nëse serbët largojnë barrikadat e vendosura. Në mesnatë janë lëshuar dokumentet e para për hyrje-dalje.
