Një video e bërë virale tregonte reperin Fero duke goditur me grushte një person në makinë, ndërsa disa persona ndërhyjnë për ta ndaluar. Pas publikimit të pamjeve ku dhunon në mes të rrugës barbarisht një person, Fero është vënë në pranga.
Sipas policisë, është identifikuar si autori i sulmit Fero ashtu edhe personi i dhunuar.
“Prokuroria Themelore në Gjilan, pas njoftimit që në media është duke qarkulluar një video incizim ku shihet një person duke e sulmuar një person tjetër në veturë, në qytetin e Gjilanit, menjëherë ka autorizuar Policinë e Kosovës-Hetuesit në Stacionin Policor në Gjilan, ku të njëjtit edhe e kanë bërë identifikimin e të dëmtuarit dhe të pandehurit, është ndaluar për 48-orë i pandehuri F.SH, me dyshimin e bazuar se i njëjti më datë 24.07.2022, ora 17h, ka kryer veprën penale, Sulm”, thuhet në njoftimin e policisë së Kosovës.
Lidhur me arrestimin e Feros, ka reaguar avokati i tij, Egzon Halimi, i cili ka treguar detaje nga ngjarja që bëri bujë.
Gjatë një bisede telefonike me “Telegrafin”, Halimi ka theksuar se Fero është provokuar nga personi që ka qenë në makinë.
“Fero ka qenë duke pirë kafe në lagjen e tij, ka parë disa të rinj poshtë te kafenetë dhe kishte vendosur t’i qeraste, kur në një moment ka kaluar një veturë, e cila e ka provokuar atë, gjë që ka çuar deri në sulmin e tij”, tha avokati Halimi.
“Personi brenda veturës ka qenë duke lëshuar një këngë të Unikkatilit, në të cilën reperi Fero shahet dhe ofendohet rëndë dhe mu përmes së saj, ai e ka provokuar Feron, ku ky i fundit nuk e ka duruar presionin dhe ka nisur konfliktin në afekt. Personat që i ka sulmuar as ky nuk i njeh, pasi rasti ka ndodhur pa paramendim, pra nuk ka të bëjë me ndonjë hasmëri”, shtoi më tej avokati.
