Gjatë dy ditëve të fundit, një temë e ndjeshme mbetet shkrirja dhe riorganizimi i gjykatave nëpërmjet draftit të hartës së gjyqësore.
Këshilli i Lartë Gjyqësor miratoi draftin e hartës së re gjyqësore (13 Gjykata të Shkallës së Parë, 2 Administrative dhe 1 Apeli), ish-kryeministri Sali Berisha reagoi ashpër duke sulmuar kryeministrin Edi Rama se po shkel të drejtat e njeriut nëpërmjet këtij drafti, si dhe po u heq aksesin banorëve të 9 qyteteve që rrezikojnë të mbeten pa Gjykata të Shkallës së Parë.
Këshilli i Lartë Gjyqësor ka miratuar draftin, i cili tashmë pritet të kalojë për mendim në Këshillin e Ministrave, Këshillin e Lartë të Prokurorisë, Prokurorisë së Përgjithshme dhe Ministrisë së Financave. Me vendimin e ri shkrihen gjykatat në Tropojë, Krujë, Lushnje, Pogradec, Mat, Përmet, Kurbin, Kavajë, Pukë.
Një ditë më parë, Ministri i Drejtësisë, Ulsi Manja, i kërkoi të heqin dorë nga bojkoti duke deklaruar se kërkesat e avokatëve janë marrë parasysh dhe ky bojkot është i pakuptimtë.
