Në nderim të ish-Presidentit të ndjerë Bujar Nishani, Qeveria ka shpallur ditë zie Kombëtare datën 2 qershor. Në të gjitha institucionet shtetërore dhe publike, do të ulet flamuri kombëtar në gjysmështizë. Ceremonia e homazheve do të organizohet në mjediset e institucionit të Presidencës.
‘SHPALLJEN DITË ZIE KOMBËTARE NË NDERIM TË TË NDJERIT, Z. BUJAR NISHANI, ISH-PRESIDENT, ISH-MINISTËR DHE ISH-DEPUTET
Në mbështetje të nenit 100 të Kushtetutës, të pikës 4, të nenit 4, të ligjit nr.8926, datë 22.7.2002, “Për formën dhe përmasat e flamurit kombëtar, përmbajtjen e himnit kombëtar, formën dhe përmasat e stemës së Republikës të Shqipërisë dhe mënyrën e përdorimit të tyre”, dhe në vijim të pikës 12, të kapitullit VI, të ceremonialit shtetëror të Republikës së Shqipërisë, miratuar me vendimin nr.420, datë 8.6.2016, të Këshillit të Ministrave, të ndryshuar, me propozimin e Zëvendëskryeministrit, Këshilli i Ministrave
V E N D O S I:
- Shpalljen ditë zie kombëtare, ditën e enjte, datë 2.6.2022, në nderim të të ndjerit, z. Bujar Nishani, ish-President i Republikës së Shqipërisë, ish-ministër dhe ish-deputet.
- Në të gjitha institucionet shtetërore dhe publike të ulet flamuri kombëtar në gjysmështizë.
- Ceremonia e homazheve të organizohet ditën e enjte, datë 2.6.2022, nga ora 10:00 deri në orën 12:00, në mjediset e institucionit të Presidencës.
- Shpenzimet e varrimit dhe të ceremonialit të përballohen nga buxheti i miratuar për Kryeministrinë për vitin 2022.
Ky vendim hyn në fuqi menjëherë”, thuhet në vendimin e qeverisë.
Ish-Presidenti i Republikës, Bujar Nishani ka ndërruar jetë në moshën 56-vjeçare, në një spital në Gjermani, ku po kurohej prej 21 Prillit. Ai vuante nga pneumonia bilaterale me insuficencë respiratore, si pasojë e komplikacioneve të shkaktuara nga Covid-19.
Fillimisht u shtrua në spitalin Shefqet Ndroqi, dhe më pas me përkeqësimin e gjendjes së tij shëndetësore u dërgua për mjekim më të specializuar në një spital në Berlin.
