Pas përfundimit të seancës plenare gjatë së cilës foli presidenti ukrainas, ish-kryeministri Sali Berisha në një prononcim për mediat ka kërkuar ndërprerje të marrëdhënieve diplomatike me Rusinë. Ai kërkoi që ambasadori rus në Shqipëri të largohet, ndërsa ai shqiptar të tërhiqet nga Moska. Sa i takon hapjes së sezonit veror dhe mikëpritjes së turistëve rusë, Berisha ka shprehur haptazi kritika. Sipas tij, kjo është një fyerje e rëndë për vendin tonë.
“Qëndresa e kombit ukrainas është një frymëzim i madh për të gjithë ata që e duan lirinë dhe besojnë te vlerat e saj.
Që në ditët e para të agresionit, kemi ngritur zërin tonë në këtë Parlament për ndihma konkrete të gjithanshme ndaj këtij kombi. Shqipëria është e rreshtuar në anën e NATO-s, OKB-së, ka dhënë ndihmesën e vet.
Ajo që na turpëroi sot është qëndrimi i dyzyar i Edi Ramës gjatë këtyre muajve të këtij agresioni barbar. Në njërën anë votohej për dënimin e tij në Këshillin e Sigurimit, nga ana tjetër promovohet ideja ruso-serbe e “Ballkanit të Hapur”, që i hap rrugë hegjemonisë serbe, influencës ruse në rajon.
Shpallja e ftesës së Edi Ramës për turistët rusë në Shqipëri. Imagjinoni, vrasës, përdhunues…pasi kryejnë masakra të vinë e të dynden në plazhet tona për të marrë veten. Kjo ishte fyerje e rëndë për Shqipërinë”.
