Kryetari i Bashkisë së Kievit, Vitali Klitschko, ka dhënë një mesazh për manifestimin i cili po mbahet në Tiranë, në shenjë solidarizimi me luftën në Ukrainë. Ai ka përshëndetur manifestimin sot në Tiranë. Nëpërmjet një video, Klitschko falenderon Shqipërinë dhe shqiptarët për ndihmën e mbështetjen, duke theksuar se ata nuk do t’i harrojnë kurrë miqtë.
“Të dashur qytetarë të Shqipërisë! E dashur Tiranë! I dashur miku dhe kolegu im, Erion! Së pari, dua t’ju falenderoj për strehimin e refugjatëve nga Ukraina, sidomos të fëmijëve tanë.
E çmojmë shumë mbështetjen tuaj politike dhe ndërkombëtare. Ndihma juaj është shumë e rëndësishme për ne, në këto çaste kritike.
E çmojmë shumë dhe nuk do e harrojmë kurrë kush janë miqtë e vërtetë të Ukrainës! Prioriteti ynë kryesor është ta ndalojmë këtë luftë të pakuptimtë në Ukrainë, të ndalojmë vrasjen e qytetarëve. E çmojmë shumë ndihmën tuaj, dhe shumë të fala nga Kievi!”, tha ai.
