Nga: Tritan Shehu
Nëntë fjalët pa letër të Presidentit Biden nga Polonia ndaj Putinit kanë hapur një debat të gjerë në botë, që po vazhdon akoma! Më kujtojnë këto fjalë atë deklaratë urdhëruese të Presidentit Regan ndaj Gorbacovit për “Murin e Berlinit” dikur, reaksionet për atë…
Por ishte koha që “foli” për vizionin e dobiprurjen e saj.
Presidenti Biden nuk është hera e parë që mban të tilla qëndrime të forta ndaj agresorëve dhe gjenocideve.
Le të kujtojmë pak çfarë ai thoshte si senator, pa “doreza” ndaj krimeve të Milloshevicit në mbrojtje të lirive e vlerave në Ballkan e Kosovë.
Ai ka qenë i tillë në politikë.
Dhe është shumë pozitiv fakti që edhe sot si President po akuzon fort edhe në planin moral shkaktarët e asaj tragjedie.
Thirrja e tij nuk është një “komplot” për grusht shteti dhe as për “atentate” në Rusi, është një thirrje morale, e bazuar mbi të drejtën e përpjekjet për të penguar e dënuar gjenocidet… si dikur fliste ndaj Milloshevicit.
Është prej një “njeriu” e politikani, që përpiqet t’i kujtojë njerëzimit vlerat morale, mbi të cilat duhet të mbështetet paqja dhe bashkëjetesa midis popujve.
Nuk ka asnjë arsye që ata që besojnë në vlerat universale ta kritikojnë për çfarë tha.
Dhe “pacifistët” nuk ka pse ta quajnë thirrje lufte, kur në fakt është thirrje paqeje.
Ashtu si nuk ka asnjë arsye që dhe dikush për arsye “diplomatike” të përpiqet ta “zbusë” atë deklaratë.
Sepse, siç ai vetë edhe e rikonfirmoi, me ato 9 fjalë iu drejtua popullit rus!
