Juristja e njohur e “Shihemi në gjyq”, Eni Çobani përfundon në gjykatë. Çobani ka kallëzuar menaxherin e zyrës së saj ligjore, Erik Çorati, dhe pretendon se i ka vjedhur 30 mijë euro nga klientët. Çorati është arrestuar. Para gjykatës, në seancën e masës së arrestit, Çorati ka mohuar akuzën duke akuzuar Çobanin.
“Më përdori për të fshehur paratë. S’kam kryer asnjë vjedhje”, ka thënë ai. Çorati është arrestuar nga Seksioni për Krimin Ekonomik e Financiar.
Çobani në cilësinë e administratores së studios ligjore që administron, ka bërë kallëzim penal ku ka shprehur se shtetasi Erik Çorati, menaxher i studios ligjore, nëpërmjet mashtrimit dhe shpërdorimit të detyrës ka përfituar shuma të konsiderueshme monetare nga klientë, të cilët paraqiteshin pranë zyrës së saj për të marrë konsulencë ligjore dhe shërbime juridike.
Çorati akuzohet për veprat penale “Mashtrimi”, “Vjedhja e kryer duke shpërdoruar detyrën”, ”Fshehja e të ardhurave” dhe “Mospagimi i taksave dhe tatimeve”. Çorati është lënë në “arrest shtëpie”.
Prokurori Bledar Valikaj është shprehur se pertej arrestit, Prokuroria do hetojë nëse kemi të bëjmë me skemë mashtrimi ndaj klienteve, dhe evazioni pasi pagesat e klienteve ndaj studios janë pa fatura tatimore të leshuara nga firma e znj.Çobani. /shqiptarja.com
