Ministrat e Jashtëm të Rusisë dhe Ukrainës do të takohen të enjten në Turqi, sipas ministrit të Jashtëm turk. Në një deklaratë televizive, Mevlüt Çavuşoğlu tha se do të marrë pjesë edhe në takimin në Antalia mes Sergei Lavrov dhe Dmytro Kuleba.
“Me iniciativat e Presidentit Erdogan dhe përpjekjet tona intensive diplomatike, ministrat e Jashtëm Sergei Lavrov të Rusisë dhe Dmytro Kuleba të Ukrainës, kanë vendosur të takohen me pjesëmarrjen time në margjinat e Forumit të Diplomacisë në Antalia”, shkroi Çavuşoğlu në Twitter.
“CNN” ka kontaktuar Ministrinë e Jashtme të Ukrainës për konfirmim. Çavuşoğlu tha se Lavrov dhe Kuleba konfirmuan pjesëmarrjen e tyre.
Forumi i Diplomacisë në Antalia është një ngjarje vjetore, dhe përpara se Rusia të pushtonte Ukrainën, lista e pjesëmarrësve përfshinte shefin e NATO-s Jans Stoltenberg dhe shefin e politikës së jashtme të Bashkimit Evropian, Josep Borrell.
Burimi i lajmit: CNN. Përshtatur nga Tirana Today
