Shefi i politikës së jashtme të BE-së, Josep Borrell, ka shprehur mbështetjen e tij për një takim urgjent të Këshillit të Sigurimit të OKB-së, pas një sulmi ndaj centralit bërthamor të Zaporizhzhia të Ukrainës nga forcat ruse. Ai ka paralajmëruar se sulme të tilla, mund të kenë pasoja “katastrofike”.
“Sulmet ruse në afërsi të drejtpërdrejtë të termocentraleve bërthamore të Ukrainës, mund të kenë pasoja katastrofike. Ata duhet të ndalojnë menjëherë”, shkroi Borrell në Twitter të premten.
“Granatimet dhe zjarri që rezultojnë në termocentralin (Zaporizhzhia) mund të rrezikojnë të gjithë Evropën,” shtoi ai.
Të premten, Inspektorati Rregullator Shtetëror Bërthamor i Ukrainës, tha se forcat ruse kishin “pushtuar” termocentralin bërthamor të Zaporizhzhia.
Sipas një deklarate të ndarë nga Energoatom – operatori i energjisë bërthamore i Ukrainës – përmes Telegramit të premten, stafi i uzinës vazhdon të punojë në njësitë e energjisë, “duke siguruar funksionimin e qëndrueshëm të objekteve bërthamore”.
Burimi i lajmit: CNN. Përshtatur nga Tirana Today
