Vatikani është i gatshëm “të lehtësojë” një dialog midis Ukrainës dhe Rusisë, për t’i dhënë fund luftës, tha të hënën Sekretari i Shtetit, Kardinali Pietro Parolin.
Parolin, i cili është zyrtari numër një i Vatikanit pas Papa Françeskut, i tha gazetës italiane Corriere della Sera se ai beson se “ka ende vend për negociata. Asnjëherë nuk është vonë”.
Ai shtoi se Vatikani ka ndjekur me “vëmendje të madhe ngjarjet në Ukrainë”, dhe se ofron “gatishmërinë e tij për të lehtësuar dialogun me Rusinë, është gjithmonë i gatshëm të ndihmojë palët për të rifilluar këtë rrugë”.
Papa Françesku foli edhe një herë të dielën mbi konfliktin, gjatë lutjes së tij javore, ku u kërkoi besimtarëve të luten. Papa ftoi të gjithë “të bëjnë 2 marsin, të mërkurën e hirit, një ditë lutjeje dhe agjërimi për paqen në Ukrainë”.
Burimi i lajmit: CNN. Pershtatur nga Tirana Today
