Kreu i PD, Lulzim Basha, ka folur në Kuvend për aferën e inceneratorëve. Edhe sot në seancën parlamentare kanë vijuar akuzat nga ana e Partisë Demokratike në lidhje me aferën e inceneratorëve karshi qeverisë. Basha ka akuzuar sërish kryeministrin Edi Rama. Sipas kreut të PD-së, ministrat që akuzohen për përfshirjen në aferën e inceneratorëve nuk mund të kenë vepruar pa dijeninë apo lejen e Ramës. I pari i demokratëve theksoi se koka e korrupsionit është kryeqeveritari Rama, i cili sipas Bashës, nuk mund t’i lajë duart nga përgjegjësia duke bërë kurban vartësit e vetë.
“Nga kjo sallë sot pritet të diskutohet një rend dite ku janë përfshirë marrëveshje rutinë, për të cilat opozita ka shprehur qëndrimin e saj. Qeveria e ktheu Spanjën dhe vende të tjera në parajsa të investimit të parave të drogës dhe milionave të korrupsionit qeveritar. Me Inceneratorët si skandali dhe vjedhja e shekullit, por tani kanë filluar të investojnë edhe jashtë vendit. Ky është një nga shqetësimet kryesore të drejtësisë së vendeve europiane. Në këtë sallë të vetmit që nuk duhet të krekosen sepse marrëveshja është bërë për krerët e tyre. Korrupsioni qeveritar problem kryesor i kuvendit. Nëse do kishit ndershmëri dhe integritet dhe nëse s’do ta bënit veten tuaj skllevër të partisë, të qeverisë, s’duhet të ishit sot këtu.
Ditë për ditë komisioni zbardh se pse Rama nuk mund të lajë duart duke bërë kurban ministrat. Megjithëse ai e ka mbiemrin Koka. Ai është bishti i kësaj afere. Koka është Edi Rama. Asgjë s’do kishte ndodhur pa mbështetjen dhe miratimin e tij. Kjo është arsyeja pse Rama e mbylli komisionin dhe u rihap pas presionit të opozitës dhe ndërkombëtarëve. 430 milionë euro vjedhje kriminale ku është përfshirë e gjithë qeveria. Prej 2018, shqiptarët paguajnë 29 euro për ton. Në mes të pandemisë kur e gjithë bota kishte ndaluar udhëtimet, këta kanë faturuar 850 mijë euro fluturime dhe udhëtime, skemë e pastër të pastrimit të parave. 10 milionë lekë në muaj është rroga e babait të njërit prej deputetëve në këtë sallë, sa 5 deputetë bashkë merr babai i njërit prej jush në këtë sallë nga inceneratorët e paguar me paratë e qytetarëve, Allqi Bllakos.
Edhe sot që flasim vazhdojnë të paguhen para të shqiptarëve për këtë aferë korruptive. A ka mundësi të ndodhë e gjitha kjo pa dijeninë, miratimin dhe pa marrjen e gjithë tepsisë nga i pari qeverisë Edi Rama? Presim të kthehet dhe të dalë para Komisionit të Inceneratorëve dhe të na shpjegojë si ky komision i ka marrë vendimet prapa shpinës së tij”.
Ministrja për Marrëdhëniet me Parlamentin, Elisa Spiropali, i është kundërpërgjigjur kryedemokratit Basha, pas akuzave që ky i fundit bëri për inceneratorët.
“Gjithçka që u tha këtu është e pabesueshme për këdo që ka mend në kokë, ka sy për të parë. Mungesa absolute e koherencës në ato që thotë dje, ato që bën sot, është ulëritëse. Është i njëjti njeri që javë pas jave, përsërit që Reforma në Drejtësi është e kapur nga kjo shumicë. Është i njëjti sot që flet për hetime nga institucione që janë krijuar përmës vullnetit politik të kësaj shumice.
Lulzim Basha është shembulli i gjallë se si jo për këto që thotë afera kaq e aq, por për fakte për procedura të provuara për vjedhje të provuar, ka shpëtuar vetë me procedurë për shkak të asaj drejtësie. Sot merret, pyetet nga prokurorë belgë dhe bën sikur s’i ka thënë ky e s’i ka bërë ky. Flet këtu për gishta e për duar. Ky që vetëm dy gishta ka lart dhe është i zhytur brenda. Ne lejuam të ngrihej komisioni për hetimin e procedurave për inceneratorët, edhe pse ishte në hetim nga SPAK e morëm këtë vendim për t’ju dhënë juve mundësinë por edhe për të qenë transparent deri në fund sepse nuk kemi gjë për të fshehur. Nëse ka patur shpërdorime detyre, atë e përcakton prokuroria. As juve dhe as Jorida Tabaku se është kthyer aty në një prokurore. Sot ka dalë në ballë të betejës duke shpallur njerëz fajtorë e duke kërkuar burgim. Ne nuk çojmë njerëz në burg, atë e bën drejtësia. Ne jemi të lirë sepse kemi marrë vendimin për ta çliruar drejtësinë dhe këtë vend nga ju dhe nga zgjedha që kishit vënë mbi këtë pushtet kushtetues”, u shpreh Spiropali.
