Për tre ditë, shkollat do jenë të mbyllura për shkak të motit të acartë. Lidhur me këtë vendim, aktivistë të Qëndresës Qytetare kanë protestuar sot përpara Ministrisë së Arsimit. Qytetarët sollën ngrohëse përballë Ministrisë, për të ironizuar situatën.
Një nga aktivistët është shprehur i rebeluar përse fëmijët lihen pa mësim, duke i fajësuar autoritetet për mos menaxhimin e situatës me ngrohjet nëpër shkolla.
“Ne nuk jemi këtu për të kuptuar ministren që ka marrë përsipër të bëjë meteorologen, nuk është ftohtë vetëm sot në 24 nesër në 25, kjo është situatë ku ne nuk mund të dalim kundër stinës. Askush s’mund të surprizohet që në janar e shkurt bën ftohtë. Kjo ministri sot shohim që lihen fëmijet pa arsim, e nuk menaxhohet dot situata e ngrohjes në shkolla”, tha Migen Qiraxhi, aktivist i Qëndresës Qytetare.
Aktivistët protestues kishin sjellë para Ministrisë së Arsimit edhe disa ngrohëse, në formë simbolike për protestën e tyre.
“Arsimi në vend sot është kthyer në momentin që e ka lënë dhe Migjeni, një kafshatë që nuk kapërdihet. Nxënësit, prindërit, duhet të kapërdijnë sot këtë kafshatë çdo mëngjes.
Në ditën ndërkombëtare të arsimit, shohim shpenzime luksi e investime marramendëse por në gjithë këtë situatë që vendi ka një Ministri që duhet të menaxhojë fondet, ligji qytetarëve i jep ngrohje, por nuk ia jep ministrja. Ligji qytetarëve u jep infrastrukturë, por infrastrukturën e mban ministrja”, tha ai.
