Ish-kryebashkiaku socialist i Fierit, Nikollaq Koshovari, ka ndërruar jetë. Mjeku i njohur fierak është shuar dje, si pasojë e një sëmundje të gjatë dhe të lodhshme. Gjatë viteve 2000-2003, Nikollaq Koshovari ka qenë kryetar i Bashkisë së Fierit.
Nikollaq Koshovari ka qenë një ndër mjekët më të spikatur ndër vite të spitalit të Fierit e më gjerë. Kirurg i talentuar e i pasionuar pas profesionit, ku ka shpëtuar jetët e qindra qytetarëve, duke u bërë shembull i mjekut të devotshëm, të palodhur e të sakrificës.
Shkrimi i plotë:
Ndahet nga jeta dr. Nikollaq Koshovari. Pas një sëmundjeje të gjatë e të lodhshme, pushoi së rrahuri zemra e dr. Nikollaq Koshovarit, njerit prej mjekëve më të spikatur ndër vite të spitalit të Fierit e më gjerë,duke lënë në pikëllim familjen,të afërmit,miqtë e kolegët.
Kirurg i talentuar e i pasionuar pas profesionit, me duart e tij ka shpëtuar jetët e qindra qytetarëve fierakë, mallakastriotë, të rrethinave e më tej, duke u bërë shembull i mjekut të devotshëm, të palodhur e të sajrificës.
Si qytetar i kulturuar, fisnik, human, bujar e zemërgjerë, ai ndodhej kudo ku njerëzit, të njohur a të panjohur, kishin nevojë për të, duke ua lehtësuar plagët.
Ai e donte Fierin, fierakët dhe spitalin e konsideronte si shtëpinë e tij të dytë, ndaj në kohët e herëshme kur ishte drejtues i tij, me një vullnet e përkushtim të madh, mundi te siguronte aparatura e pajisje mjeksore, qe spitalet e tjera i kishin zili e që deri vonë mbaheshin mend si aparatura “te kohës së Nikollaqit”.
Me cilësitë e tij te çmuara njerëzore e profesionale, emri i tij ishte vendosur me kohë ne plejaden e mjekëve të shquar të spitalit e qarkut të Fierit dhe sot ndahet nga jeta, i nderuar e respektuar nga të gjithë kolegët,miqtë e besoj nga gjithë bashkëqytetarët e tij, të cilët ai i donte aq shumë.
Lamtumirë i nderuar koleg, mbetsh i paharruar e të qoftë dheu i lehtë! Ngushëllime të thella Mirës(bashkëshortes), femijëve Lorina e Gjergji e gjithe të tjerëve!
