Autorëve të tentativës së dështuar të arratisjes nga 313, i është konfirmuar izolimi. Arbër Çekaj, Fatmir Pjetri dhe Lulzim Çepele kanë dalë mesditën e sotme para Gjykatës së Tiranës, e cila ka konfirmuar izolimin për 90 ditë, pas tentativës së dështuar të arratisjes. Prokuroria kërkoi t’i caktohet masa shtesë arresti, në kuadër të procedimit “tentativë arratisje” e “goditje për shkak të detyrës”, ndërkohë që ka njoftuar se po kryen hetime edhe nëse ndonjë prej policëve të burgjeve mund të ketë bashkëpunuar.
Çekaj, Pjetri dhe Çepele, i paraburgosuri në Burgun 313 në Tiranë të cilët organizuan dhe më pas tentuan arratisjen, janë vendosur për 90 ditë në izolim. Sipas ligjit, ata do izolohen për 90 ditë dhe s’do të kenë kontakte me familjarë apo të burgosur.
Të tre këta personazhe kanë dalë të qeshur para gjykatës. Arbër Çekaj mohoi të ketë pasur plan që të arratisej. Ai tha se doli jashtë për ajrosje, e se nuk e dinte se Fatmir Pjetri do të arratisej. “Dola për ajrosje, nuk e dija që Fatmiri do arratisej, shkova pas tij”, ka thënë Çekaj.
Avokatja e Çekajt: Plani ishte i Pjetrit
Me anë të një letre dërguar mediave, avokatja mbrojtëse e Arbër Çekajt, ka hequr të gjithë përgjegjësinë e klientit të saj nga plani i arratisjes nga burgu. Ajo ka akuzuar Fatmir Pjetrin si organizator të arratisjes.
“Arbri nuk ka goditur asnjë polic. I ndikuar nga gjendja e rënduar psikologjike për shkak të arrestimit të burgosjes së babait, ai vetëm ka ndjekur në mënyrë instiktive Fatmir Pjetrin, kur e ka parë duke u larguar. Nuk ka qenë meritë e policit ndalimi i tyre, por vetë Arbri ka menduar dhe është kthjelluar se kjo nuk është zgjidhje.
Ai nuk është kriminal dhe respekton lidhjet e shtetit, në të kundërt tani do të ishte larguar për në Dubai apo ndonjë shtet tjetër. Në qoftë se do të ishte kriminel, po do të ishte duke pirë kafe në Kosta Rika. Ai gjithashtu pohon se ka segmente të caktuara të shtetit që po punojnë kundër familjes Çekaj. Ai është thjeshtë një viktimë, pasi plani ishte i Fatmir Pjetrit, fakt që ai e ka pohuar edhe vetë. Ai ka qenë me kafe në dorë dhe kur e ka parë të largohej e ka ndjekur, pa e ditur se ku po shkonte. Kjo është e vërteta e vetme dhe gjithë të tjerat janë spekulime”, thuhet në letër.
Çepele: S’kam lidhje me arratisjen
Lulzim Çepele ka thënë sot para gjykatës se nuk ia kishte idenë se çfarë po ndodhte me arratisjen. Çepele ka deklaruar se ka tentuar vetvrasjen, për shkak të presionit.
“Nuk kam asnjë lidhje me këtë tentativë për arratisje. Unë për shkak të presionit, kam tentuar vetëvrasjen, dhe nuk ia kisha idenë se ç’po ndodhte me një plan arratisje”.
Arratisje me anë të çarçafëve
Arbër Çekaj, i dënuar me 14 vjet heqje lirie për trafikun e 613 kilogramëve kokainë nga Ekuadori, Fatmir Pjetri anëtar i bandës së “Babagjyshëve”, të ndihmuar nga Fatmir Çepele, kishin planifikuar arratisjen nga qelitë këtë të diel, por pa mundur ta realizojnë. Të dënuarit do të largoheshin me litar të improvizuar duke lidhur çarçafët me njëri-tjetrin. Sipas Drejtorisë së Përgjithshme të Burgjeve, plani ka nisur të vihet në zbatim me tentativën e Çepeles për të prerë damarët, për të tërhequr në këtë mënyrë vëmendjen e stafit të burgut 313. Në momentin kur forcat e sigurisë janë angazhuar për ta shoqëruar në spital, ka hyrë në veprim Arbër Çekaj dhe Fatmir Pjetri, të cilët kanë tentuar të arratisen gjatë orarit të ajrimit. Pikërisht në ato momente ata janë pikasur nga punonjësit e policisë së burgut, të cilët kanë marrë masat për kapjen dhe neutralizimin e tyre. Gjatë tentativës për të dalë, dy të burgosurit kanë goditur dhe një prej policëve të burgut 313, i cili është dërguar për marrjen e ndihmës shëndetësore.
Dosja e plotë
Apeli i Gjykatës së Posaçme kundër Korrupsionit ka lënë në fuqi dënimin me 14 vite burg për Arbër Çekajn, pronari i kontejnerit me banane e kapur me 613 kg kokainë në Portin e Durrësit. Arben Çekaj u dënua me 21 vite burg, por përfitoi ulje nga gjykimi i shkurtuar dhe do të vuajë 14 vite burg. Çekaj është dënuar si pjesë e grupit kriminal të trafikut të kokainës, pasi iu kap sasia prej 613 kg kokainë më 27 shkurt 2018, që e kishte fshehur në dyshemenë e konteinerit me banane.
Fatmir Pjetri ka qenë pjesë e një grupi kriminal “Babagjyshët”, të cilët gjatë periudhës janar-dhjetor të vitit 2013 dhe në vazhdim, në qytetet e Tiranës, Laçit, Fushë-Krujës, Kuçovës dhe Durrësit kanë grabitur me armë disa argjendari në këto qytete. Grabitja që bëri më shumë bujë, ishte ajo në një qendër tregtare në Tiranë, ku të maskuar si babagjyshë, pjesëtarët e grupit kriminal realizuan grabitjet. Fatmir Pjetri pas arrestimit në Holandë në 24 nëntor 2017, u ekstradua në Shqipëri për të vuajtur dënimin. /Tirana Today
