Një krim i rëndë në familje tronditi mbrëmjen e djeshme Klosin, ku nënë e bijë po hetohen si autoret e vrasjes së kryefamiljarit, Ylber Lezi, 48-vjeç. Masakra në familje ka ndodhur në fshatin Gurrë e Vogël të Njësisë Administrative Gurrë në Bashkinë e Klosit. Dyshohet se 48 vjeçari Ylber Lezi është vrarë me mjete të forta brenda banesës së tij, dhe autoret paraprakisht mendohet se janë vajza dhe bashkëshortja e tij.
Kryeplaku i fshatit Gurrë e Vogël, Ibrahim Elezi, ka rrëfyer se ka dëgjuar rreth orës 22:00 të mbrëmjes të së dielës britma në banesë. Pasi i është drejtuar banesës në fjalë, bashkëshortja e të ndjerit Mine Lezi ka refuzuar të hapë derën. Më tej është njoftuar policia e cila ka mbërritur në vendin e ngjarjes, dhe ka hyrë me forcë brenda. Ai tregon më tej se viktima ka qenë përdorues alkooli, e ndërsa bashkëshortja e tij me probleme mendore. Kryeplaku i fshatit shprehet se për shkak të gjendjes së rënduar ekonomike, vajza e familjes ka rënë në depresion.
“Nuk e dimë se si ndodhi por dëgjuam zhurmë, dolëm jashtë pamë që dera ishte e mbyllur. Nuk hymë dot dhe telefonuam policinë, ora ka qenë 10 pa pak dhe në 10 e gjysmë erdhi policia.
E kemi komshi, ka qenë përdorues alkooli në masë, bashkëshortja me probleme mendore, vajza në depresion për gjendjen ekonomike, mblidhen të gjitha ato. Energjinë elektrike ia patëm lidh para pak ditësh, e shkatërruan nga gjendja mendore. Shteti ka dhënë ndihmë ekonomike 60 mijë lekë, ata nuk kanë qenë kuruar me ilaçe. Ai ishte godit me sende në kokë, me dru ose tullë, se kanë qenë mbrëmë prokurori. Gjysmë ore ka nejt i vdekur”.
