Situata në komunën e Deçanit vijon të jetë e rëndë. Mediat në Kosovë raportojnë se një numër i konsiderueshëm qytetarësh, kanë kërkuar ndihmë mjekësore në Qendrën e Mjekësisë Familjare “Adem Ukëhaxhaj” në këtë komunë. Bëhet fjalë për 114 qytetarë, të cilët kanë kërkuar ndihmën e mjekut, ndërsa kanë patur shenja të helmimit.
Doktoresha Feride Dautaj, në një prononcim për “Telegrafin” ka thënë se nga ora 15:00 e së mërkurës e deri sot në orën 07:00, ndihmë mjekësore kanë kërkuar 114 pacientë.
“Prej tyre 67 kanë qenë me simptomatologji të helmimit, kurse dy raste i kemi referuar për në Spitalin e Pejës”, tha Dautaj.
Dautaj shtoi më tej se një fëmijë i moshës 1 vjeç është dërguar në Spitalin e Gjakovës.
“Një fëmijë i moshës 1 vjeç i cili ka qenë duke u trajtuar që tre ditë në QKMF në Deçan, është dërguar për në Spitalin e Gjakovës, për shkak të përkeqësimit të gjendjes shëndetësore”, u shpreh Dautaj.
Komuna e Deçanit ka shpallur gjendje emergjente.
