19-vjeçarja nga Gjilani, Tuti Sejdiu, rrëmbeu pak ditë më parë kurorën e “Miss Universe Kosovo 2021”. Ajo ia dedikoi çmimin të atit të saj, i cili ndodhet në qeli, pasi ka luftuar për të gjitha padrejtësitë që i janë bërë asaj kur ka qenë e vogël. Bukuroshja nga Komuna e Gjilanit ka treguar se në moshën 13-vjeçare është përdhunuar e trafikuar nga disa persona.
“Arsyeja që kam ardhë në Miss Universe janë familja ime, kam apliku, kam ardhë dhe nuk e kam besu që jam fituesja. Kjo kurorë i dedikohet vetëm familjes time që kanë sakrifiku shumë për mu, e vazhdojnë që të sakrifikojnë”, thotë ajo.
Ajo tha se në sallë nuk ndodhej i ati, pasi kërkoi drejtësi për vajzën. 19-vjeçarja ka treguar se ishte vetëm 13-vjeç kur është trafikuar nga persona të ndryshëm, në Kosovë e Serbi. Për fat të keq, pesonat që kanë abuzuar me të janë të lirë. Tuti Sejdiu nxorri në pah detaje të rënda, ku zbuloi se të atin nuk e lejojnë për ti marrë në telefon dhe se nuk ka asnjë informacion se në çfarë gjendje është.
“Po e shoh familjen time, vetëm një karrige e zbrazët është aty. Babai im është sot në burg për mu, vetëm që ka luftu për mu, për padrejtësinë që ma kanë ba mu”.
“Në moshën 13-vjeçare jam përdhunu e jam trafiku nga persona të ndryshëm nga Kosova në Serbi, derisa prindi jem nuk ka lanë institucion pa kërku drejtësi, ata njerëz që janë mundu me ma marrë mu jetën ata sot janë në liri, nuk janë në burg, babi vetëm pse ka kërku ndihmë për mu, nuk është pranë meje po është në burg. Drejtësi nuk ka pas asnjëherë. Çka është më e rënda, babin nuk e di a është mirë, nuk e lejojnë as me na thirr në telefon, as me e pa e me i fut rroba në burg, nuk e di në çfarë gjendje mundet me kanë, unë them publikisht se unë do të luftoj për babin jo për veten, e kam me nxjerrë drejtësinë në vend”.
“Kjo kurorë ka vlerë të madhe për mu e ka dëshmu që unë jam femër e fuqishme e pranë familjes, pavarësisht sfidave. Asgjë nuk më dojket e vështirë në jetë, vetëm duhet të ketë pak durim”, ka thënë ajo në një intervistë për ATV.
“Unë shpresoj që të vendoset drejtësia, sepse 5-6 vite jemi tu luftu, personi që më ka bë të gjitha këto gjana, familjarët e tij janë në institucion që punojnë, janë të korruptuar. I kisha bë apel të gjitha gjykatave, që vendosne dorën në zemër se sot më ka ndodhë mu, nesër i ndodhë fëmijës tënd. Unë jam shumë e fort, edhe pse babai është larg meje”, tha Sejdiu.
Në këtë dëshmi tronditëse, bukuroshja ka rrëfyer se për abuzimin e saj është dënuar një person me tre vite burg, dhe se vijon që të marrë kërcënime nga familjarët e tij.
“Gjithë janë të lirë, asnjë nuk është në burg, ai që ka qenë trafikuesi kryesor, ai është dënu vetëm 3 vite në burg, nuk kanë marrë asnjë masë, mu më kanë kërcënu me vite, ma kanë ndalu shkollimin e të gjitha, mendoj se do të vazhdoj aty ku kam mbetë, nuk më vjen turp. Fillimisht, e kam prioritetin te drejtësia”.
“Ata persona i përballë shtëpisë, janë fqinj me mu edhe nuk ka ditë, nuk ka natë që nuk bajnë familjarët e tij, se personi në fjalë nuk ndodhet aty, e familjarët e tij gjithmonë më provokojnë, po unë mundona me shiku rrugën teme e me vazhdu përpara”, shtoi ajo.
