Ekrani italian ka humbur sot një nga prezantueset dhe këngëtaret që për dekada ka frymëzuar shumë nga ata që i kanë hyrë botës së televizionit- Raffaella Carra. Ajo u shua në moshën 78-vjeçare pas një sëmundje që e mposhti. Lajmin e trishtë e ka bërë të ditur koreografi i famshëm Sergio Iapino. “Raffaella na ka lënë. Ajo shkoi në një botë më të mirë, ku njerzillëku i saj, e qeshura e saj e pagabueshme dhe talenti i saj i jashtëzakonshëm do të shkëlqejnë përgjithmonë”, ishin fjalët prekëse të tij.
Raffaella Carrà kishte një karrierë të shënuar me suksese të mëdha, që nga koha e Fantastico, Pronto Raffaella, te ato të Carramba Che Sorpresa, deri te paraqitjet në kinema.
Raffaella ka marrë pjesë në dhjetëra filma midis viteve 1960 dhe 1970, siç është filmi “Von Ryan Express” në 1965 me Frank Sinatra. Në të njëjtin vit këngëtarja italiane nterpretoi në komedinë muzikore “Scaramouche”. Në vitin 1971, ajo pati suksesin e saj të radhës në shfaqjen televizive ‘TV Canzonissima’, duke interpretuar këngën “Chissà se Va”. Në vitin 1984, gazeta ‘L’Espresso’ e kishte përshkruar Carrà si “Më të duartrokitur se presidenti Pertini, më e ‘shtrenjtë’ se lojtari i futbollit Michel Platini dhe më e mrekullueshme se shenjtori modern Padre Pio”
Ndërsa së fundmi, ka qenë protagoniste në Rai3, ku ka pasur në një rol të ri, atë të intervistuesit, ballë për ballë me personalitete të mëdha të muzikës, televizionit dhe kinemasë, të tilla si Riccardo Muti ose Maria De Filippi.
