Thonjtë mund të rrëfejnë shumë për shëndetin tonë. Edhe pse ajo që konstatohet nga pamja e thonjve është e kufizuar dhe kërkon më shumë kontrolle, pamja e thonjve mund të kthehet në një pasqyrë të disa shqetësimeve që shfaqen në trupin tonë.
Ajo që dihet është se, pas formimit të tij, thoi nuk ndryshon më. Rritja e tij është një proces i gjatë. Por në pjesën e thoit, thonë mjekët, mund të dallohen disa tipare mungesash apo defektesh. Për shembull, një sëmundje sistematike e rëndë me ethe mund të lexohet në vijat horizontale të thoit vetëm pas dy deri në tre muaj nga faza akute e sëmundjes. Për vetë pacientët, ndryshimet e thoit janë shpesh një shenjë e parë dhe e dukshme alarmi, e cila në disa raste duhet të pasohet nga vizita tek mjeku.
Shatë llojet e thonjve që “lexohen”
1-Vija horizontale apo gropëza në thua
Të ashtuquajturat linja Beau-Reil ( të njohura me këtë emër në nder të mjekut francez Joseph Honore Simon Beau, 1806-1865, që i ka interpretuar për herë të parë këto vija), krijohen kryesisht atëherë kur rritja e thoit gjatë një sëmundje ngadalësohet, për shembull nga një infeksion me temperaturë të lartë prej kemioterapisë etj…
2-Thua si xhami i orës
Kockat e fundit të gishtave të duarve apo të këmbëve janë të fryra, thonjtë tepër të harkuar. Shkaku është shpesh një keqfurnizim kronik me oksigjen, për shembull nga sëmundjet e zemrës apo të mushkërive. Ky furnizim i çrregullt me gjak bën të mundur intensifikimin e çlirimit të faktorëve të rritjes në enët e gjakut të gishtave dhe bën që të rritet një ind lidhor i ri.
3-Thonj si lugë
Kjo ndodh kur pjesa e mesit të thoit është e futur brenda, ndërsa anët të dala jashtë. Thonjtë si lugë janë shpesh shenjë treguese për mungesë hekuri. Tek fëmijët ky lloj ndryshimi shfaqet edhe në thonjtë e këmbës.
4-Sindroma e thoit të verdhë
Thonjtë duken të trashë dhe me ngjyrë të verdhë. Rriten ngadalë, nuk kanë lidhje të fortë me shtratin e thoit dhe madje mund edhe të bien. Mungon lëkura e thoit. Shpesh kjo sindromë haset tek pacientët me edema limfatike dhe infeksione kronike të rrugëve të sipërme të frymëmarrjes.
5-Thonj me pika
Ato hasen shpesh tek pacientët me psoriazë, por edhe te ata me mungesë zinku. Pikat janë pasojë e pllakës së vogël psoriatike që shfaqet për kohë të shkurtër në thellësi të rrënjës së thoit.
6-Thonj të thyeshëm
Mund të dëshmojnë për gjendje kronike mungese vitaminash apo oligoelementesh, për shembull tek anoreksia, bulimia apo dieta përjashtuese në ndonjë sëmundje të caktuar. Shpesh thonjtë e thyeshëm shkaktohen edhe nga përkujdesja e gabuar, si larja apo shpëlarja e shpeshtë e duarve.
7-Vija për së gjati
Janë të padëmshme. Gjenden praktikisht tek çdo. njeri mbi të 35-at dhe janë shenjë pjekurie. Shkaku i saktë nuk dihet ende, por mendohet se mund të jetë e trashëguar. /Tirana Today
