Një në tri meshkuj shqiptar rrezikohet të mos kenë aftësi riprodhimi si rezultat i moskurimit në moshën deri në 1 vjeç për zonën ku qëndrojnë testikujt. Edhe fëmijët e kuruar pas moshës 1 vjeç kanë një shkallë të lartë rreziku, por njëkohësisht kanë edhe shanse kurimi. Doktori androlog Evin Dani shprehet për “Tirana Today” se “vetëm një pjesë e vogël e meshkujve me këtë problem tyre kurohen në kohën e duhur, ndërsa të tjerët e lënë sëmundjen të përparojë për vite me radhë”. Sipas Danit, sëmundja e njohur si” varikocela” ( anomalia që shfaqet në venat e testikujve, çka më pas çon në shfaqjen e infertilitetit tek meshkujt) si dhe “kritokida” ( testikujt e fshehur, qe ngjiten e zbresin nga barku ne qesken e testeve) nuk shfaqin simptoma të dukshme, ndaj e vetmja rrugë për ta parandaluar është vizita tek mjeku që në fazat e para të lindjes. Dani thekson se edhe pas kurimit këto raste duhet të ndiqen me të tjera vizita deri në moshën e pubertetit.
Alarmin për këtë fenomen e ka ngritur edhe mjeku i njohur neonatal, Eduart Tushe, i cili prej kohësh ka kërkuar një ndërgjegjësim të mjekëve neonatalë në të gjithë vendin që të ushtrojnë kontrolle më të imtësishme në testet e fëmijëve dhe t’i drejtojnë drejt poliklinikave të specializuara kur hasin anomali. “Neglizhenca e këtyre kontrolleve lejon më pas edhe shkaktimin e anomalisë së infertilitetit”, shprehet Tushe, duke vënë alarmin e një shifre të madhe mes meshkujve shqiptarë.
Si për Danin ashtu edhe për Tushen, është me rëndësi që të ndërtohet një statistikë e qartë, që t’u vijë në ndihmë më pas prindërve që të jenë të vëmendshëm në kurimin e këtij fenomeni, që më pas i privon meshkujt të jenë prindër natyralë.
Sipas raportimeve të bëra nga autoritetet shëndetësore, vihet në dukje se në vendin tonë rreth 50 për qind të problemeve të të mospasurit fëmijë në çift vijnë nga meshkujt. Në këto kushte e vetmja formë për të parandaluar një gjendje të tillë, është marrja e kujdesit mjekësor sa më herët. Pavarësisht fushatave sensibilizuese të zhvilluara mbi shëndetin riprodhues në mentalitetin e meshkujve shqiptarë është ende e ulët shkalla e frekuentimit të mjekut androlog. Madje, edhe sipas doktor Danit, mbi 70 për qind e meshkujve në Shqipëri nuk e njohin fare një specialitet të tillë.
Në rast të moszbritjes së testikujve sugjerohet rruga e ndërhyrjes kirurgjikale, pasi çdo vonesë sjell pasoja në aftësinë riprodhuese, pasi temperatura e qeskave ku qëndronë testet është 1 gradë më e ulët se temperatura e barkut.
Çfarë është “Varikocela”?
Varikocela e meshkujve është një zgjerim i venave për rreth testikujve, që ka si shkak prishjen e valvulave të venës spermatike të brendshme. Në rastin e varikocelës, valvulat e vogla në brendi të venës spermatike janë të prishura (nuk kryejnë funksionin e tyre) dhe gjaku venoz, në vend që të shkojë lart, në drejtim të zemrës si zakonisht, ai kthehet mbrapsht, në drejtim të testikulit, duke realizuar zgjerimin e venave të skrotumit (pleksit pampiniform spermatik). Zgjerimi i venave rreth testikujve, ka si pasojë ngritjen e temperaturës lokale mbi 32 gradë celcius, që duhet të jetë temperatura normale për këtë zonë dhe, si pasojë, kjo influencon në mundësinë e testikujve që të prodhojnë një numër më të vogël spermatozoidesh si edhe me lëvizshmëri më të dobët, me pasojë sterilitetin mashkullor. Nëse diagnoza e varikocelës do të bëhet kur dëmet janë më të vogla, në pjesën më të madhe të rasteve, bëhet i mundur që shërimi të jetë pa pasoja. Nëse njohja e kësaj patologjie bëhet me vonesë dhe nuk kurohet në kohën e duhur, mundësitë e shërimit kufizohen në mënyrë të ndjeshme./ TIRANA TODAY
