Vrasja monstruoze që ndodhi në Greqi, vijon të jetë po kaq dinamike sa në ditët e para, ndërsa mësohen detaje të rënda. Çifti për një kohë të gjatë ka patur probleme të vazhdueshme, e ndërsa fotot që ndanin me miqtë e familjarët në rrjetet sociale dëshmonin një anë tjetër, po kaq manipuluese. Natën që ndodhi krimi, Caroline Crouch dhe Babis Anagnostopoulos kishin shkëmbyer mesazhe të vazhdueshme me njëri-tjetrin, në dhoma të ndryshme. Ka qënë ky momenti vendimtar që Babis të inskenonte në mendjen e tij një grabitje, për ti dhënë fund jetës së bashkëshortes. Për 37 ditë me radhë, ai u shfaq si burri dinjitoz e madje i drejtohej mediave se kishte besim tek drejtësia për të kapur autorin. Psikologu Athanasios Hambesis shpjegon se vrasja, nuk ka qenë një vendim i momentit.
“Krimi që bëri 32-vjeçari ishte i neveritshëm. Ky njeri kishte planifikuar ‘krimin e përsosur’ në mendjen e tij. Ky nuk është një vendim i momentit. Atë natë fatale, çifti ka shkëmbyer mesazhe nga dhoma të ndryshme të shtëpisë. Ne dalim në përfundimin se ata ishin të distancuar nga njeri-tjetri, pavarësisht se jetonin në një shtëpi”, tha Hambesis dhe shpjegon se ata nuk e kuptuan seriozitetin e problemit që ishte krijuar.
“Ata nuk arritën të kuptonin as vetë seriozitetin e problemit. Ekzistonte një distancë mes tyre, ndërsa në rrjetet sociale ata tregonin një tjetër pamje.
Ata gjithashtu kanë fshehur diçka. Nëse ai do të ishte treguar i logjikshëm dhe nëse do të kishte ndjenja, mbase do të gjente një zgjidhje dhe do të ndaheshin në mënyrë dinjitoze, tha psikologu Athanasios Hambesis, duke shtuar se piloti ishte i lodhur mendërisht.
Në një moment ai ka humbur kontrollin, nuk ka duruar më presionin brenda tij, dhe për një periudhë të shkurtër ai do të kuptojë aktin e tij të urryer. Ai ende nuk e ka kuptuar që ai vrau nënën e fëmijës së tij”.
Sipas dëshmisë së rreme të 32-vjeçarit, tre persona të cilët shkuan për ta grabitur përfunduan duke vrarë 20-vjeçaren britanike, qenin e familjes dhe duke torturuar edhe vetë atë. 20-vjeçarja u gjet e vrarë në papafingo të shtëpisë, pranë krevatit të fëmijës së saj 11 muajsh, ndërsa burri i saj 32-vjeç, kishte krijuar një skenë sikur ishte i lidhur në një karrige në dhomën e gjumit.
Raporti mjeko-ligjor
Babis ka synuar ta vriste gruan e tij. “Synimi i autorit të krimit ishte të vriste viktimën”, tregon përfundimi i hetimit mjeko-ligjor i publikuar nga protothema.gr.
“Ishte një agoni dhe jo një vdekje e menjëhershme” , thuhet në raportin mjeko-ligjor. Nga të dhënat e autopsisë, konstatohet se vdekja ka ndodhur pas një përleshje fizike, pasi dëmtime gjenden në pjesë të ndryshme të trupit të 20-vjeçarit.
Si u zbulua vrasja
Ora inteligjente e Carolines dhe telefoni i 32-vjeçarit çuan policinë drejt përfundimit se ky i fundit ishte autori i krimit të rëndë që tronditi Greqinë. Mediat greke shkruajnë se Caroline ishte duke fjetur, në momentin kur i shoqi e mbyti.
Ky përfundim është arritur nga përpunimi i të dhënave në orën inteligjente që ajo kishte të vendosur në momentin e ngjarjes së rëndë. Viktima kishte të vendosur një orë me aplikacionin që regjistron rrahjet e zemrës, hapat, ngjitjen dhe distancën e përshkuar.
Ditari i Caroline: Po mendoj të largohem
20-vjeçarja kishte menduar të largohej nga piloti që nga dhjetori i vitit 2019. Sipas shënimeve të saj, që janë bërë pjesë e dosjes, e reja kishte sulmuar burrin. “E godita, dhe ai theu derën”, ka shkruar vajza.
Në një frazë tjetër të ditarit ajo shkruan: “Nuk jam mirë, jam shumë e mërzitur”, duke përshkruar një marrëdhënie veçanërisht të konfliktuar me partnerin e saj. E reja shkruan se e kanë humbur fëmijën e tyre të parë, dhe për një moment ajo i ka thënë fjalë lënduese të shoqit, për të cilat shton se është penduar.
Dëshmia e pilotit: Mendova të zhduk trupin e gruas
Piloti 32-vjeçar grek është shprehur se ka menduar të zhdukë trupin e 20-vjeçares, pasi i druhej faktit se vajza e tyre mund të mbetej vetëm. “Një ndjesë e madhe për njerëzit që lëndova. E di që ka shumë pak vlerë. Ajo që bëra nuk justifikohet. Sjellja e saj me lindjen e fëmijës ndryshoi shumë. Ajo ishte bërë agresive. Natën e vrasjes Caroline tha “mos e sill vajzën, nuk e dua”.
Unë i thashë që ajo duhet të ngjitet lart dhe të flejë. Unë e mbaja fort që ajo të më dëgjonte. Ajo po dridhej. Pastaj e mbulova me jastëk. Ajo po dridhej derisa në një moment ajo ndaloi. U përpoqa ta zgjoja, por më kot. Mendova çfarë do të ndodhte me fëmijën tonë. Mendova ta zhdukja kufomën e saj. Pastaj për ta bërë sa më të besueshme ngjarjen, vrava qenin. Askush nuk do e merte me mend që atë e kisha vrarë unë nëse lëndoja qenin”, është shprehur Babis. /TIRANA TODAY
