Ndonëse ka muaj që është shuar legjenda e futbollit Diego Armando Maradona, detajet tronditëse nuk kanë të ndalur. Një infermier i të ndjerit, ka hapur çështje të reja. Ricardo Almiron, 37-vjeç, i cili është akuzuar për neglizhencë, i ka thënë prokurorëve argjentinas se ai po ndiqte urdhrat “për të mos shqetësuar” ikonën e futbollit ndërsa ai flinte. Almiron ishte kujdestari i Maradonës gjatë natës dhe ishte një nga njerëzit e fundit që e pa gjallë ish-fituesin e Kupës së Botës. Ai mohoi të ketë braktisur pacientin e tij, duke pretenduar se ai ishte kishte marrë urdhra që të mos e zgjonte.
Infermieri dyshohet se ka gënjyer
Ai dyshohet se ka gënjyer kur pretendoi se Maradona ishte duke fjetur, dhe po merrte frymë normalisht. Një autopsi zbuloi se ai po vdiste në atë kohë. Almiron është një nga shtatë personat nën hetim për “vrasje me dashje” pasi një bord ekspertësh që vëzhgonin vdekjen e Maradonës, zbuluan se ai kishte marrë kujdes joadekuat dhe ishte braktisur për një “periudhë të zgjatur”.
Almiron mbërriti menjëherë pas mesditës me avokatin e tij Franco Chiarelli në zyrën e prokurorit publik në San Isidro, në periferi të kryeqytetit Buenos Aires. Duke folur para gazetarëve, Chiarelli tha se Almiron “gjithmonë e trajtonte Maradonën si një pacient me një gjendje të ndërlikuar psikiatrike”, por asnjëherë nuk iu tha për “një çështje që lidhej me sëmundjen e zemrës”.
Maradona, një prej lojtarëve më të mirë në historinë e futbollit
Diego Armando Maradona, i lindur më 30 tetor 1960 në një nga lagjet më të varfra të Buenos Airesit, dëshmoi talentin e tij fill pasi iu dhurua një top futbolli për tre vjetor. Dhe topi do të ishte shoqëruesi i tij deri në frymën e fundit. Më vonë, ai u spikat nga trajneri i Argentinos Juniors, i cili nuk i besonte syve sesi një djalë tetë vjeçar mund të manovronte në atë lloj mënyre.
Në fillim të nëntorit të vitit 2020, 60-vjeçari i ishte nënshtruar një operacioni për mpiksje gjaku në tru. Atëherë u njoftua se Maradona po trajtohej edhe për varësinë ndaj alkoolit.
Maradona konsiderohet si një prej lojtarëve më të mirë në historinë e futbollit. Në vitin 1986, ai fitoi Kupën e Botës dhe po atë vit bëri histori me golin kundër Anglisë që më vonë u quajt “dora e Zotit”.
