Kandidati për kryetar i Partisë Demorkatike, Fatbardh Kadilli ka vijuar turin e tij, teksa ditën e sotme pati një takim me demokratë të degës nr.2 në kryeqytet.
Gjatë fjalës së tij, Kadilli ironizoi kryetarin aktual në detyrë, duke thënë se kryeministri Edi Rama nuk mposhtet duke thënë ”Rama ik”. Ai tha vendimi për të garuar për kreun e PD, erdhi pasi mendon se Basha e ka drejtuar gabim opozitën, dhe nuk ka trajtuar kauzat e nevojshme për të krijuar besimin popullor.
Fatbardh Kadilli: ”Ai nuk largohet duke i thënë ‘Rama ik’, duhet të jemi ne të zotë të ngremë një baticë të madhe elektorale për ta përjashtuar atë nga pushteti. Nëse nuk e bëjmë dot këtë, nuk është faji i askujt, përveç liderit. Ndaj mora vendimin por të dalë këtu sepse e kam parë sesi e ka kuptuar gabim ai opozitën, ka shkuar drejt një opozite spontane me kauza që i gjen në rrugë si sende. Si Astiri, dializa, pse këto ishin hapësirat e vetme korruptive? Do kaloni mbi trupin tonë për të bërë këtë apo atë, me kauza të vogla. Opozita jep mbështetje morale por nuk mund të identifikohemi ne me kauza. I harxhon energjitë 1 vit e gjysmë me Astrin, ndërsa ata morën lekët në xhep e ikën se kishin ndërtime pa leje, kjo është të mos bësh kauza programore, por rastësore që mbyllen në mënyrë shumë të paqartë. Kjo është të konceptosh totalisht gabim”.
Më 13 qershor, Partia Demokratike zhvillon zgjedhjet për kryetarin e ri. Përballë Lulzim Bashës, do të garojnë Edith Harxhi, Agron Shehaj dhe Fatbardh Kadilli.
