Detaje të reja kanë dalë në dritë sa i takon ekzekutimit të Everest Çakës. 41-vjeçari u vra në një atentat mafioz në Elbasan, në sy të bashkëshortes së tij. Ngjarja ndodhi rreth orës 20 e 10 minuta në lagjen “Skënderbe”, teksa 41-vjeçari i cili njihej edhe me emrin Ibrahim Çaka, ishte duke udhëtuar me automjetin tip ‘Opel’ së bashku me bashkëshorten e tij Silvana Çaka.
Autorët i kanë prerë rrugën dhe e kanë qëlluar Çakën brenda në makinë, duke i shkaktuar atij vdekjen e menjëhershme.
Mirjan Dedja Asllani, i shoqëruar disa herë në polici për të dëshmuar në lidhje me vrasjen e Everest Çakës në Elbasan, ka apeluar ndaj policisë për të zbardhur ngjarjen.
Ai pretendon se e akuzojnë padrejtësisht, dhe se po i shkatërrohet jeta atij dhe familjes. Mirjan Dedja pranon se kishte miqësi me viktimën, por nuk ka asnjë lidhje me ngjarjen.
Intervista e plotë:
Mirjan, a keni patur ju njohje me shtetasin Everest Çaka?
Po. Kam pasur njohje. Njohje shumë të gjatë. Kam jetuar me vëllain e Everestit, Noçen, në Spanjë, në Tarragona. Pasi e kanë vrarë Noçen në Spanjë, atëherë kam bërë letrat spanjolle dhe jam kthyer në Shqipëri.
Kohët e fundit a ishit takuar me Everestin, si në Spanjë apo edhe në Shqipëri?
Jo, unë jam takuar para 2 vitesh me Everestin ne Spille.
Në Spanjë kishit kontakte me të?
Jo, s’kam patur kontakte fare me Everestin. Vetëm jemi përshëndetur, sa herë që jemi takuar në Elbasan.
Ditët përpara se të vritej, keni kontaktuar me të?
Jo.
41-vjeçari humbi jetën menjëherë. Në vendin e ngjarjes u gjetën mbi 15 gëzhoja. Njëri prej plumbave ka plagosur në dorë edhe Silvanën, e cila është jashtë rrezikut për jetën. Rreth një orë më pas, makina e autorëve u gjet e djegur në Golem të Kavajës, dhe brenda saj ishte lënë edhe pistoleta e përdorur në krim.
