Kryeministri Edi Rama ka bërë me dije se në muajin korrik, do të hapen regjistrimet e Akademisë së Re të Lidershipit.
Rama u shpreh se kjo Akademi është për të rinjtë që duan të lexojnë, dinë të flasin, por edhe të stërviten në grup për të zhvilluar aftësitë e tyre të komunikimit e vendimmarrjes.
Kreu i qeverisë tha se ka shumë kërkesa për të qenë pjesë e kësaj Akademie, por ka pak vende të lira.
Postimi i Ramës në rrjetin social, Facebook
KUR DO FLASIM
Në korrik do të hapim regjistrimet e Akademisë së Re të Lidershipit për vajza e djem ambiciozë, sfidues, kokëfortë. Të rinj që duan të lexojnë e që dinë të flasin, po dhe të dëgjojnë. Të pakënaqur me si shkojnë gjërat përreth, po edhe me veten e tyre. Individë që dëshirojnë të stërviten në grup, për të zhvilluar aftësitë e tyre të komunikimit dhe vendimmarrjes.
Për këdo që e gjen veten në këta rreshta, që nuk është më pak se 16 vjeç e më shumë se 26 vjeç, e që dëshiron ta provojë mundësinë e vet për një vend në Akademinë e Re të Lidershipit, kjo është adresa:
https://liderakademi.al/
Kërkesa mund të ketë shumë, po vende janë pak. Prandaj kush aplikon duhet ta mbajë parasysh se ka më shumë gjasë të humbasë, se sa të fitojë! Por kush dëshiron dhe njëherësh ngurron, le të lexojë këto fjalë të Michael Jordan:
“Kam humbur më shumë se 9000 gjuajtje dhe thuajse 300 ndeshje. E kam humbur gjuajtjen e fitores 26 nga herët që ma besuan. Në jetën time kam dështuar herë pas here dhe përsëri. Dhe prandaj i’a kam dalë të kem sukses”.
