Presidenti i Shteteve të Bashkuara të Amerikës, Joe Biden ka miratuar një shitje me vlerë 735 milion dollarë të armëve të drejtuara me precizion në Izrael.
Shitja e armëve, për të cilën Kongresi u njoftua më 5 maj, një javë para se të fillonte përshkallëzimi aktual Izrael-Palestinë, përfshin municione të përbashkëta sulmuese, të cilat përdoren për të kthyer bomba në raketa të drejtuara me precision, shkruan Al Jazeera.
Disa ligjvënës dhe ndihmës thanë se shitja mund të shkaktojë një opozitë në Kongres, ku kritikat për mbështetjen e administratës Biden për Izraelin në mes të konfrontimit vdekjeprurës janë bërë më të përhapura.
“Lejimi i kësaj shitje të propozuar të bombave inteligjente të kalojë pa bërë presion mbi Izraelin për të rënë dakord për një armëpushim do të mundësojë vetëm një masakër të mëtejshme”, tha një ligjvënës në Komitetin e Punëve të Jashtme të Dhomës për gazetën The Washington Post.
Sipas ligjit amerikan, administratës i kërkohet të njoftojë Kongresin për shitje të tilla. Ligjvënësit kanë 20 ditë kohë për të miratuar një rezolutë që kundërshton shitjet.
Të paktën 198 palestinezë në Gaza, duke përfshirë 58 fëmijë, kanë mbetur viktimë nga sulmet izraelite që nga fillimi i përshkallëzimit më 10 maj. 10 izraelitë, përfshirë dy fëmijë, janë vrarë në sulmet me raketa nga Gaza.
Hamasi dhe grupe të tjera të armatosura filluan të qëllonin me raketa në drejtim të Izraelit të hënën e javës së kaluar, pas protestave mbi dëbimin e palestinezëve nga lagja Sheikh Jarrah në Jeruzalemin Lindor dhe sulmet që rezultuan nga forcat izraelite të sigurisë në kompleksin e Xhamisë Al-Aqsa.
