Duket se dosja e Elbasanit, ku ndodhi edhe përplasja me një viktimë vetëm pak ditë përpara zgjedhjeve, do të jetë një një nga pjesët më voluminoze që Partia Demokratike ka depozituar në Komisionin Qendror të Zgjedhjeve, duke kërkuar përsëritjen e procesit të votimit në 9 qarqe, ku përfshihet edhe Qarku i Elbasanit. “Qarku i Elbasanit kontrollohet nga bandat”, thuhet në dosjen ku janë përfshirë shumë emra. PD përmend edhe listën e kandidatëve për deputetë atje, ku midis të tjerësh është edhe shtetasi Klevis Xhoxhi, “nipi i gruas së ish kryetarit të Bashkisë Elbasan, Qazim Sejdini, i cili mbështetet fuqishëm nga grupi kriminal i Suel Çelës”. Midis emrave të përmendur nga PD është edhe kandidati për deputet, tanimë i zgjedhur Saimir Hasalla, dhëndri i ish-deputetit Aqif Rakipi, i cili “mbështet fort nga grupi kriminal i Ardian Rakipit, që është vëllai i Aqif Rakipit.
Sipas dosjes së PD-së, dorëzuar në KQZ, Ardian Rakipi është ndër trafikantët më të fuqishëm të drogave të forta dhe jo vetëm në vend, me aktivitet në Holandë, Itali dhe Angli. Më tej, në dosje thuhet se në këtë qark, rastet e shitblerjes së votës dhe shkeljet e tjera flagrante të ligjit janë të shumta, ndërsa për periudhën mars-prill janë depozituar 50 kallëzime penale në SPAK dhe 130 kallëzime në prokuroritë e rretheve. “Ndër 50 kallëzimet e depozituara në SPAK, 30 prej tyre kanë të bëjnë me raste flagrante të shitblerjes së votës nga drejtues e përfaqësues apo mbështetës të Partisë Socialiste”, thuhet më tej.
Demokratët pretendojnë se në këtë qark, kandidatët socialistë kanë ngritur një infrastrukturë kriminale që cënoi standardet e zgjedhjeve. “Nga informacioni dhe të dhënat e mbledhura nga strukturat e Partisë Demokratike është vërejtur një rritje e aktivitetit kriminal në Qarkun e Elbasanit, i cili konsiston kryesisht në kërcënimin e strukturave të Partisë Demokratike nga eksponentë të krimit të organizuar, blerjen e votave kundrejt shumave të caktuara me vlera monetare, premtimeve përpunësim nga ana e eksponentëve të Partisë Socialiste që operojnë në Qarkun e Elbasanit, ka nisje për largime nga puna, mbledhje e mjeteve identifikuese”, thuhet më tej.
PD përmend edhe emrat konkretë që sipas saj janë përfshirë nëkëto veprimtari. “Shtetasi Suel Çela, shtetasi Klemend Xhaferri, Marsel Agron Rroka, Gëzim Rusi, Ernaldo Metaj, Ernest Skilja, Mehmet Greca, janë angazhuar në veprime penguese përmes kanosjes, dhunës apo çdo mënyrë tjetër ndaj subjekteve zgjedhore në mënyrë që këto të fundit të zhvillojnë veprimtarinë e tyre në përputhje me ligjin gjatë fushatës zgjedhore”, thuhet më tej në dokumentin e dorëzuar në KQZ.
