Katër persona kanë grabitur rreth 100 milionë lekë të vjetra në zyrën e kompanisë “Aiba”, në pronësi të Presidentit të Federatës Shqiptare të Futbollit, Armand Duka.
Policia nuk ka bërë asnjë njoftim zyrtar në lidhje me ngjarjen e ndodhur në 14 prillin e këtij viti, teksa lajmi është bërë publik sot në disa media. Po ashtu, është konstatuar thyerje e kasafortësh dhe vjedhje parash në zyrën e Dukës.
Mendohet se janë vjedhur 75 mijë euro dhe 10 milionë lekë të vjetra, të cilat bashkërisht arrijnë në një vlerë të përafërt me 100 milionë lekë të vjetra.
Policia gjyqësore ka kqyrur kamerat e sigurisë së ndërtesës, të cilat janë të pajisura me sistem video dhe audio. Nga kamerat e biznesit tregohet se autorët e vjedhjes kanë qenë 4 persona, të veshur sportiv, me maska anti-covid në fytyrë, triko me kapuç në kokë.
Ndërkohë, policia duket se është e bindur që autorët kanë pasur informacion nga brenda kompanisë, kjo nisur nga fakti që 4 personat nuk kanë humbur kohë brenda godinës, por kanë shkuar menjëherë në vendet ku gjendeshin paratë.
