Komisioni Qëndror i Zgjedhjeve është mbledhur sot në orën 17:00 ku ka certifikuar zgjedhjet parlamentare të 25 prillit 2021, si dhe fitoren e Partisë Socialiste që mori 74 mandate.
Gjatë mbledhjes u paraqitën tabela për rezultatin e votimit në 11 qarqet e vendit, për subjektet zgjedhore dhe për kandidatët për deputetë për zgjedhjet për Kuvendin e Shqipërisë të datës 25 prill 2021.
Për qarkun e Kukësit, rezultatet u certifikuan që më datë 1 maj. Duke mos pasur ankesa nga Partia Demokratike, Partia Socialiste përmes përfaqësuesve në KQZ, rezultatet u certifikuan.
Në tabela nuk rezultoi të kishte asnjë mospërpuethshmëri apo problematikë në shifra. Konkretisht u miratuan rezultatet e zgjedhjeve për Tiranën, Durrësin, Fierin, Beratin, Elbasanin, Shkodrën, Dibrën, Lezhën, Vlorën, Korçën dhe Gjirokastrën.
Nga sot, secila parti ka 5 ditë afat të bëjë ankimim zyrtar në Komisionin e Ankesave dhe Sanksioneve (KAS) nëse kanë pretendime për rezultatin, apo kërkesa për rinumërim.
Pasi KAS të shqyrtojë të gjitha ankesat dhe të dalin vendimet nga Kolegji Zgjedhor, kryekomisioneri Ilirjan Celibashi do të shpërndajë mandatet me emrat e deputetëve të rinj.
