Klajda Gjosha u zgjodh ministre e Integrimit Europian në kabinetin e kryeministrit Edi Rama pas zgjedhjeve parlamentare të vitit 2013, si përfaqësuese e Lëvizjes Socialiste për Integrim. Ajo u largua nga detyra në vitin 2017, pas prishjes së koalicionit PS-LSI.
Klajda Gjosha është diplomuar për Politikë dhe Marrëdhënie Ndërkombëtare në vitin 2005 në universitetin Reading në Mbretërinë e Bashkuar. Në vitin 2006, ajo kreu studimet Master në të njëjtin universitet për Studime Europiane.
Gjosha është kryetare e Forumit të Gruas në LSI si dhe anëtare e kryesisë. Ajo ka qenë gjithashtu nënkryetare e Lëvizjes Socialiste për Integrim.
Përvojën e parë në administratën publike e ka pasur në vitin 2004 si specialiste në Ministrinë e Punëve të Jashtme. Gjosha ka punuar më pas në Ministrinë e Punës dhe në Bashkinë e Tiranës, ndërsa në vitin 2012 u zgjodh zv.ministre në kabinetin e kryeministrit Berisha.
Ky raport u prodhua nga BIRN pas administrimit të deklaratave të pasurisë së ish-ministres Klajda Gjosha nga Inspektoriati i Lartë i Deklarimit dhe Kontrollit të Pasurive dhe Konfliktit të Interesit, ILDKPKI. Ai ka për qëllim bërjen e transparencës për anëtarët e Këshillit të Ministrave për vitet 2013-2020.
Skeda grafike e mëposhtme paraqet pasurinë e deklaruar nga ish-ministrja e Integrimit Europian, Klajda Gjosha nga viti 2008 deri në fund të vitit 2018.
Në deklaratën e parë të dorëzuar në ILDKPKI në vitin 2008, Klajda Gjosha nuk zotëronte asnjë pasuri, ndërsa në fund të vitit 2018, pasuria familjare kap vlerën e 11.9 milionë lekëve, duke shënuar një rritje mesatare vjetore prej 1.7 milionë lekësh.
Znj.Gjosha deklaron familjarisht pasuri të paluajtshme me vlerë 10.7 milionë lekë dhe likujditete bankare prej 1.1 milionë lekësh.
Të ardhurat familjare për periudhën deklaruese janë 21.2 milionë lekë, nga të cilat 52% burojnë nga paga e znj.Gjosha dhe gati 23% nga paga e familjarëve. Rreth 17% e të ardhurave totale burojnë nga aktiviteti i biznesit privat të bashkëshortit.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrollin aritmetik/logjik për 7 vite të deklarimit, asnjë prej deklaratave nuk rezultoi me problem.
Nga analiza cilësore e deklaratave të pasurisë, vlen për t’u theksuar se përvse përveç pasurive në emër të saj dhe të bashkëshortit, Gjosha ka deklaruar edhe pasuri në emër të prindërve.
Në deklaratën e vitit 2009, ajo deklaron një apartament me sipërfaqe 96m2 dhe me vlerë 36 mijë USD në emër të prindërve, e cila nuk është përfshirë në analizën e pasurisë.
Në vitin 2015, subjekti deklaron blerjen e një apartamenti dupleks me çmim 78,062 euro, me burim financiar një kredi bankare prej 8.8 milionë lekësh, të ardhura nga paga prej 1.5 milionë lekësh si dhe 600 mijë lekë hua nga aktiviteti i biznesit të bashkëshortit. Huaja është shlyer plotësisht në vitin 2017.
Gjithashtu, në deklaratën e vitit 2013 mungojnë të ardhurat nga biznesi të bashkëshortit në rubrikën përkatëse./BIRN/
