Aktivistja e shoqërisë civile, Sevim Arbana ndodhet në një proces gjyqësor me kryeministrin Edi Rama.
Ditën e sotme, ajo deklaroi se gjykata ka pranuar kërkesën e avokatit të saj, që në gjykim të jetë personalisht i pari i qeverisë në rolin e paditësit.
Përmes një postimi në rrjetet sociale, Arbana shkruan se është në pritje të përballjes me kryeministrin.
“Në gjyqin tim me KM Edi Rama, Gjykata ka pranuar kërkesën e avokatit im av. Dorian Matlija që në gjykim të jetë personalisht kryeministri Rama në rolin e paditësit. Sot gjykata pranoi kërkesën tonë. Jam në pritje të datës dhe përballjes me kryeministrin. Drejtësia që duam, kryeministri që s’duam”, shkruan Arbana në Facebook.
Rama paditi Arbanën në tetor të vitit 2019 për shkak se kjo e fundit kishte deklaruar në një emision televiziv, se ai ka ushtruar dhunë ndaj një ministreje të kabinetit të tij duke e pickuar në një prej hoteleve të Tiranës.
