Kryetari i Komisionit të Ekonomisë dhe Financave, Anastas Angjeli ka ironizuar prezantimin e programit të PD nga kreu i opozitës, Lulzim Basha, të cilin e cilësoi si “plakun e vitit të ri”.
Angjeli tha se me programin e PD, nuk zgjidhen problemet kryesore të ekonomisë që ka vendi ynë sot.
“Ajo që pashë, dëgjova dhe që u mundova ta ndiqja me shumë vëmendje në të gjithë rrjetet sociale, është se më tepër qytetarët presin një program për të parë zgjidhje për problemet që ka ekonomia e vendit tonë. Ndërkohë, nuk pamë një burrë shteti që erdhi me një program për të na thënë si do zgjidhen problemet më themelore të ekonomisë, por më la përshtypjen e një plaku të Viti të Ri që ka hedhur një thes në kurriz me disa lekë dhe thotë, ti ke dhënë një, unë të jap dy. Kjo më shqetëson”, u shpreh Angjeli në ”Top Talk”.
Ndër të tjera, ai vuri në pah se Basha nuk dha asnjë zgjidhje në lidhje me problemet më themelore të cilat janë: pandemia, kriza ekonomike, tërmeti dhe orientimi i ekonomisë pas periudhës post Covid.
Sipas Angjelit, fjalët e kreut të opozitës marrin formën e një premtimi, një pazari mes forcës politike që e kërkon dhe elektoratit të vet. Nuk besojnë më shqiptarët forma të tilla politike.
