Dy trupat e pajetë të vëllezërve Andrea dhe Martin Olldashi në Maliq, janë gjetur nga një banor i zonës. Dëshmitari Guri Shuli, tha se trupat ishin të mbuluar, ku njëri prej tyre kishte dorën e zbuluar.
“Unë i gjeta, jam punonjës si ujësjellësit, dhe këtë rrugë e bëj çdo ditë, sot pashë në një kanal ishin të mbuluar një trup, kishte vetëm një dorë jashtë. Kur e pashë që ishte trup njeriu njoftova policinë. Pastaj ata e panë që ishin 2 trupa”, tha ai.
Dy vëllezërit, ishin larguar nga banesa e tyre që prej mbrëmjes së 7 dhjetorit dhe deri në gjetjen e trupave të pajetë nuk ka patur asnjë informacion për ta.
Në lidhje me këtë ngjarje menjëherë është ngritur një grup i posaçëm hetimor, me ekspertët më të mirë të Policisë Kriminale të strukturave hetimore në Drejtorinë Vendore të Policisë Korçë, nën drejtimin e Prokurorisë të Rrethit Gjyqësor Korçë, ndërsa forca operacione nga Korça dhe efektivë të Komisariatit të Maliqit kanë nisur krehjen e zonës.
Nuk dihen ende rrethanat e ngjarjes së rëndë, ndërsa mësohet se njëri prej tyre, Andrea, ka qenë disa herë me burg për vjedhje, kryesisht banesash.