Presidenti rus, Vladimir Putin nuk do ta urojë presidentin e zgjedhur amerikan, Joe Biden, derisa të zgjidhen sfidat ligjore për zgjedhjet në SHBA dhe rezultati të jetë zyrtar.
Putini është njëri nga liderët botërorë që nuk e kanë komentuar fitoren e Bidenit, e cila u njoftua nga mediat më të mëdha, shkruan AP.
Kur Trump fitoi më 2016, Putin ishte i shpejtë në urimin ndaj tij, por zëdhënësi i Putinit, Dmitry Peskov, u tha gazetarëve se ky vit është ndryshe.
“Ju mund të shihni se disa procedura ligjore po ndodhin atje, të cilat u njoftuan nga presidenti në detyrë – prandaj kjo situatë është e ndryshme, kështu që ne e konsiderojmë të saktë të presim për njoftimin zyrtar”, tha ai.
Ekipi i presidentit, Donald Trump, ka premtuar veprime ligjore në ditët në vijim dhe Trump ende nuk e ka pranuar humbjen, ndërsa pretendon se ka pasur mashtrim në shkallë të gjerë të votuesve.
