Është e vërtetë që ilaçet luajnë një rol kryesor në zhdukjen e dhimbjeve në trupin tonë. Por në rastet e dhimbjes kronike, marrja e tyre mund të shoqërohet me efekte anësore serioze. Fatmirësisht, shumë studime kanë treguar se ekzistojnë metoda alternative për të trajtuar dhimbjen, të cilat kanë të bëjnë me përqendrimin dhe fuqinë e mendjes. Ja mënyrat kryesore sesi fuqia e mendjes arrin të lehtësojë dhimbjet:
- Të menduarit mbi ushqimin
Të gjithë e dimë se çfarë është ngrënia emocionale, dhe si shijimi i një vakti të mirë mund
të na ngrejë humorin. Por edhe vetëm të menduarit mbi ushqimin që ju pëlqen, mund të bëjë mrekulli për trupin tuaj.
Një studim i Universitetit të Uiskonsinit, tregoi se kur dikush mendon për ushqimin e tij të preferuar, intensiteti i dhimbjes që ka zvogëlohet. Çokollata ishte fantazia më e zakonshme e ushqimit të preferuar midis pjesëmarrësve në studim.
- Frymëmarrja e kontrolluar
Frymëmarrja e thellë diafragmatike, mund të jetë shumë e dobishme pasi stimulon sistemin nervor parasimpatik, që funksionon si qetësues. Efektet e tij në lehtësimin e simptomave mendore si ankthi dhe tensioni janë të njohura prej kohësh. Por teknika e duhur e frymëmarrjes, mund të ketë efekte më të prekshme edhe në shëndetin fizik. Teknika e frymëmarrjes “Lamaze” bazohet në këtë logjikë, dhe u rekomandohet grave shtatzëna për ta bërë lindjen një proces më pak të dhimbshëm.
- Shfokusimi i vëmendjes nga dhimbja
Dhimbja është në fakt një mekanizëm mbijetese, i krijuar për të tërhequr vëmendjen tonë tek problemi që e shkakton atë. Por kur dhimbja është kronike, është e domosdoshme të gjesh një mënyrë për ta hequr vëmendjen nga ajo. Kjo gjë mund të arrihet me aktivitete që sjellin gradualisht relaksim, si leximi i një libri apo shikimi i një filmi.
- Lutja
Një studim zbuloi se edhe vetëm përsëritja e një tingulli, e një fjale, apo e një lutjeje, qoftë edhe për 30 sekonda, zvogëlonte intensitetin e ndjesive të pakëndshme. Studiuesit nga Spitali i Përgjithshëm i Masaçusetsit në SHBA, sugjerojnë zgjedhjen e një fjale ose fraze neutrale ose të këndshme, e cila u provua më efektive sesa tingujt.
- Vizualizimi
Imagjinojeni dhimbjen tuaj si një masë të madhe të kuqe, të cilën ju përpiqeni ta zvogëloni ngadalë ose ta ktheni atë në ngjyrë rozë dhe më të butë. Ju gjithashtu mund të imagjinoni sikur jeni në një vaskë me ujë të vakët dhe me duart që ju pluskojnë mbi ujë. Imagjinoni se çfarë po ndodh në çdo pjesë të trupit tuaj. Nëse në fillim e keni të vështirë, duhet të bëni disa ushtrime vizualizimi, për të përmirësuar aftësinë tuaj për t’i vizualizuar gjërat.
- Pikat e presionit
Shtypni butësisht me dorën zonat që ju dhembin, sidomos kur është një dhimbje koke apo dhimbje muskulore. Presioni dërgon mesazhe në tru, që e neutralizojnë dhimbjen ose zvogëlojnë tensionin e muskujve në një mënyrë të tillë që e zhdukin shkakun e dhimbjes. Sidoqoftë, nëse masazhi e bën dhimbjen edhe më të fortë, zgjidhni ndonjë teknikë tjetër të lehtësimit të dhimbjes.
- Muzika
Muzika ndikon në shumë mënyra në trurin e njeriut. Disa nga efektet më të dukshme të muzikës përfshijnë relaksimin, lehtësimin e ankthit, dhe shtimin e funksionimit të trurit. Kërkimet me pacientët që vuajnë nga artriti, treguan se ata që dëgjonin muzikë për 1 orë në javë i kishin më të ulëta nivelet e dhimbjes dhe shqetësimit.
- Kreativiteti
Terapia ekspresive po fiton gjithnjë e më shumë terren si një mjet për lehtësimin e simptomave të sëmundjes mendore, por edhe për luftimin e dhimbjeve fizike. Studimet kanë treguar se 1 orë art terapeutik, i zvogëlon simptomat mendore dhe fizike tek pacientët me AIDS dhe kancer.
- E qeshura
Një studim i Universitetit të Kalifornisë,tregoi se fëmijët dhe të rriturit që shihnin video qesharake, teksa duart e tyre ishin të zhytura në ujë me akull, kishin një rezistencë më të madhe ndaj ndjesive të pakëndshme.
Pra siç mund ta shihni, fuqia e mendjes mund të bëjë shumë gjëra të mëdha për trupin tuaj. Por vlen edhe efekti i kundërt gjithashtu. Mendimet dhe emocionet negative mund ta dëmtojnë shëndetin tuaj fizik. Prandaj, përdoreni me zgjuarsi fuqinë e mendjes tuaj!
Burimi i lajmit: https://www.learning-mind.com/can-the-power-of-mind-be-stronger-than-the-pain/
Përshtatur nga TIRANA TODAY
