Ish-ministrja e Arsimit, Lindita Nikolla, ka komentuar largimin e Besa Shahinit nga posti i ministres, para përfundimit të mandatit.
Në një intervistë për Abc News, Nikolla tha se nuk e sheh si shqetësues largimin e Shahinit. Ajo theksoi se Shahini arriti ta përfaqësonte me shumë përgjegjësi Ministrinë e Arsimit.
Sipas saj, largimi i Shahinit nuk duhet të sjellë kritika, pasi qeverisja është një program dhe jo një fushë-betejë.
Pjesë nga intervista:
Do të kishit dashur të ishit ministre?
Nikolla: Nuk di të them a do të kisha dashur të isha, por edhe mund të kisha dashur. Vështirësitë janë të shumta. Ajo që është më rëndësi është se unë ndihem shumë pranë. Për 5 vite pata nderin të administroja. Nuk jam shkëputur, për të dhënë mendim dhe këshilla.
Gjatë kësaj kohë ju kanë kërkuar këshilla, kush? Besa vetë ju ka kërkuar këshilla?
Nikolla: Kemi komunikuar, në momente të caktuara ajo ka telefonuar.
Si i keni pasur marrëdhëniet kur ishte zv. ministrja juaj?
Nikolla: Ka shumë aludime, por bashkëpunimi me Besën ka qenë shumë i mirë. Kam qenë me fat që edhe një përfaqësuese nga Kosova me projekte të caktuara ka qenë një zë i cili është dëgjuar.
Ja u komunikoi kryeministri arsyen e largimit?
Nikolla: Arsyet ishin sheshit, kujtojmë që ishte një protestë studentore që adresoi disa problematika.
Domethënë,- ju ishit koke turku?!
Nikolla: Jo… nuk e thashë këtë.
Ishin disa situata problematika dhe ai institucion kërkonte energji të re. Ndoshta kishte ardhur momenti për një energji të re.
Më duhet të them që Besës, iu desh jo vetëm të përshtatej me një mentalitet tjetër, por ana tjetër, drejtoi sektorin e arsimit në momentet të vështira, në situatën e tërmetit, që kërkonte një përgjegjësi ndryshe. Unë besoj që Besa ka punuar me shumë përgjegjshmëri dhe ka bërë më të mirën.
Përse nuk i shkoi deri në fund mandatit?
Nikolla: Besoj që këto pyetje duhet t’ja bëni Besës.
Jam e prirur të besoj atë që Besa bëri publike. Edhe në komunikimin që kam pasur me Besën, të njëjtën përgjigje kam marrë.
A është një dështim, kur ti i thua që unë nuk do të marr pjesë në betejën e 25 prillit?
Nikolla: Personi në fjalë e pa të arsyeshme që nuk do të jetë pjesë e fushatës së ardhshme. Ka problematika që lidhen me familjen… Unë them që ky nuk është moment për tu kritikuar.
Më çfarë karte qeverisëse do të shkoni përpara elektoratit?
Nikolla: Nuk është një betejë që ka marrë pushkën, qeverisja është një program. Unë nuk Besoj që Besa dhe përfaqësues të tjerë që u bënë pjesë e qeverisë nuk kanë çuar përpara programin.
Edhe unë edhe Ditmiri jemi anëtarë të PS. Nuk ka ikje dhe rikthime, ne kemi qenë aty. Unë u largova nga qarku Lezhë për të marrë një detyrë si sekretare e burimeve njerëzorë. Nuk ka asnjë gjë të keqe kur një skuadër riformaton energjitë.
Ju nuk e dinit më parë?
Nikolla: Jo nuk e dija, por kjo nuk ka rëndësi.
