Nga Klodian Tomorri
Kazinotë nuk po hapen tani. Kazinotë nuk u mbyllën asnjëherë. Sepse po të ishin mbyllur, atëherë kazinoja e Taiëanit nuk kishte për të qenë e hapur. Dhe po kështu, Plaza nuk kishte se si të merrte licencën, që mori para disa muajsh.
Ato që u mbyllën me ligj, ishin bastet sportive dhe kazinotë elektronike. Ligji ka dy përkufizime të ndryshme mes kazinosë dhe kazinosë elektronike. E thënë trashë, e para ka dhe lojëra jo elektronike si ruleta apo black jack-u, e dyta ka vetëm lojëra elektronike me makineta.
Çfarë ka bërë qeveria me vendimin e ri? E para ka përcaktuar zonën ku mund të ndërtohen kazino në Tiranë duke e ngushtuar rreth qendrës. E dyta, i ka dhënë mundësinë Taiëanit që të rinovojë licencën automatikisht pa garë për 10 vjet të tjera.
A është kjo një gjë e keqe? Normalisht kur nuk ka garë, ka gjithmonë korrupsion. Por në rastin konkret duhet përmendur edhe një detaj shumë i rëndësishëm. Taiëani nëse do ta rinovojë licencën duhet të paguajë 10 milionë dollarë. Ish Apexi e mori licencën tek Plaza me 70 milionë lekë ose 700 mijë dollarë për 10 vjet. Pra 15 herë më pak.
Ky është pisllëku i madh i ligjit për kumarin. Me pretekstin e nxitjes së turizmit, ligji i jep të drejtën çdo hoteli me 5 yje që të hapë kazino duke e paguar licencën 10 vjeçare vetëm 70 milionë lekë ose 700 mijë dollarë. Ndërkohë që kazinotë jashtë hoteleve me 5 yje, paguajnë 10 milionë dollarë. Ky është ligj i pistë.
Si mund të jepet një licence 10 vjeçare kazinoje për vetëm 70 milionë lekë ose 700 mijë dollarë? Pra vetëm 70 mijë dollarë në vit për të pasur kazino. Është ulëritëse. Pastaj, mënyra se si merren pesë yjet në Shqipëri është një zgavër tjetër korrupsioni.
Debati se pse u japin kazinotë eshët i kotë. Debati i vërtete duhet të jetë ky. Pse hotelet duhet ta marrin licencën e kazinosë vetëm me 700 mijë dollarë. Çfarë incentive është kjo? Si nxitet turizmi kështu? Më tej akoma, si rriten investimet në ekonomi? Ja pyesni, çfarë investimesh shtesë bëri Plaza që mori 5 yjet. Ndaj është ligj i pistë.
