Dy shpërthime të përmasave të mëdha tronditën pasditen e së martës kryeqytetin libanez, Bejrut. Ngjarja e rëndë ndodhi pranë portit të kryeqytetit libanez, më të madhit në vend, kur vala shpërthyese shkatërroi gjithçka.
Pamjet e shpërndara në media afër zonës së shpërthimit, tregonin viktima të mbuluar nga pluhuri, po kështu edhe të plagosur rëndë.
Presidenti i vendit tha se shkak është bërë shpërthimi i 2.750 ton nitrat amoniumi që ishin ruajtur në një mënyrë të pasigurt në një depo për gjashtë vite me radhë. Kjo sasi ishte shkarkuar nga një anije në port në vitin 2013 dhe më pas ishte ruajtur në një depo.
Fillimisht u raportua se ishte një shpërthim në një fabrikë fishekzjarresh, por më pas u mësua se bëhej fjalë për një krim njerëzor, për të cilët autoritetet kanë paralajmëruar se fajtorët do të mbajnë përgjegjësi.
Një video që të thyen zemrën është shpërndarë masivisht në media. Në pamje shihet se si një baba përpiqet të mbrojë djalin e tij, pas shpërthimit të fuqishëm. Ata ndodhen në banesën e tyre dhe pas shpërthimit, babai kërkon të fusë të birin poshtë tavolinës për ta mbrojtur.
