Komiteti shkencor në Francë paralajmëron se në vjeshtë ose dimër mund të përballemi me një valë të dytë të pandemisë së koronavirusit.
Paralajmërimi vjen në një kohë kur rastet e reja në Francë janë rritur ndjeshëm. Më shumë se 3 mijë raste janë konfirmuar vetëm në tre ditët e fundit. Sipas Reuters, edhe numri i personave që trajtohen në kujdes intensiv nëpër spitale, ka filluar të rritet.
“Ecuria afatshkurtër e pandemisë, kryesisht është në duart e popullatës”, thuhet në një deklaratë të komitetit shkencor për virusin.
“Në të, po ashtu i kërkohet qyteteve të mëdha të përgatiten për një plan për më shumë izolime lokale në varësi të epidemisë”, shkruan e përditshmja franceze “Le Monde”.
Përveç Francës, shumë vende të tjera në Evropë po regjistrojnë një rritje domethënëse të rasteve të reja në javët e fundit.
Belgjika, Luksemburgu dhe Spanja po ashtu kanë parë që shifrat të rriten, çka edhe ka ndezur frikën për një rikthim të virusit në kontinent.
