Djali i akademikut të njohur Moikom Zeqo, Epidamn Zeqo, tregon se sëmundjen e rëndë të të atit e ka marrë vesh ditën e dasmës së tij.
I ftuar në emisionin “Historia ime” në TV Klan, Epidamni shprehet se ka qarë shumë kur e ka marrë vesh. Ai tregon se leukemia kronike nga e cila humbi jetën akademiku, është një sëmundje që kontrollohet por që nuk mund të shërohet.
Kujtojmë se Moikom Zeqo humbi jetën para më shumë se dy javësh, për shkak të kësaj sëmundjeje të rëndë.
Pjesë nga intervista:
Si e përballuat sëmundjen e Moikomit?
“Ditën që e mora vesh se babi kishte leukemi kronike, ishte dita e dasmës sime, si të thuash dita më e lumtur, por edhe më e rëndë. Qava gjatë dasmës normale, por edhe u gëzova shumë edhe bëmë party. Është e vështirë me këtë sëmundje, është sëmundje që kontrollohet e menaxhohet, por që nuk shërohet. Kërkon kimioterapi, kërkon ilaçe të tjera”.
A ishte i fortë?
“Ishte i fortë, prandaj duroi kaq shumë. Ai ka qenë kampion noti. Unë e mbaj mend babin që gjithmonë ecte para dhe shumë shpejt, e mbaj mend të fuqishëm e normale kur e shikon degradimin trupor, të vjen keq. Është shumë e dhimbshme, e shkuara në spital, lufta që mami im ka bërë për të siguruar ilaçet për babin kanë qenë të tmerrshme e të lodhshme për të gjithë”.
