Ditën e sotme rreth 32 mijë maturantë do të ulen në bankat e shkollës për të zhvilluar testin e matematikës.
Provimi nuk do të zgjasë 2 orë, siç ndodhi me Letërsinë, por 2 orë e 30 minuta, duke u plotësuar kështu një nga kërkesat e maturantëve.
Provimi nis në orën 10:00 dhe do të përfundojë në 12:30.
Ndërkohë pas testit, maturantët sërish pritet të zhvillojnë protesta.
Ata bënë me dije ditën e djeshme se pas provimit të matematikës, do të protestojnë para Ministrisë së Arsimit në orën 13:00 për rivlerësimin e provimit të Gjuhës Shqipe dhe Letërsisë.
Sipas tyre testi ka pasur shumë pasaktësi.
Kujtojmë se lidhur me protestat e maturantëve të cilët kërkojnë rishikimin e testit të letërsisë, ka reaguar dje edhe Komiteti i Maturës Shtetërore 2020 (KOMSH).
Sipas këtij të fundit, është gjykuar që të rishihet mënyra e shpërndarjes së notave sipas pikëve të marra nga maturantët në test.
“Kjo do të bëhet vetëm pasi të kemi rezultatin e pikëve të marra nga maturantët. QSHA do të publikojë testin e plotë dhe për çdo pyetje përgjigjen e saktë, në mënyrë që çdo maturant duke u konsultuar me to, të mund të bëjë një vetëvlerësim të asaj çka ai është përgjigjur në test. Menjëherë sapo të dalin rezultatet, maturantët krahas notës së tyre do të kenë dhe variantin që kanë pasur në provim me alternativën e saktë”, thuhej në deklaratë.
