Rama nuk është kursyer sot ndaj të gjithë atyre që e kanë kritikuar, madje edhe e kanë ofenduar dhe mallkuar gjatë periudhës së pandemisë. Mjaft i kujdesur me fjalët, kryeministri i dha një “shuplakë të fortë” të gjithë kritikëve, me theks të veçantë ndaj palëve kundërshtare, të cilët këto dy muaj e kanë vënë me “shpatulla pas murit”. Kreu i qeverisë tha se ndryshe nga ç’thonë ngado, sidomos kritikët e tij në politikë, ai nuk vret dhe nuk vjedh. Po kështu, nuk shantazhon dhe nuk shpif.
“Kurrë më nuk do të paragjykohen nga askush për shkak të emrit albanese. Do të bëjmë çmos të përmbushim sa më mirë detyrimin njerëzor ndaj mjekëve, edhe pse nuk e shlyejmë dot atë ç’ka ata bënë heroikisht në këtë kohë të mallkuar. Më vjen mirë, që kjo kohë, që tronditi botën, e i vuri drynin ekonomisë, nuk na gjeti me spitalet e viteve më parë, pa ilaçe, pa çarçafë e batanije. Pa një banjo të vetme. Nuk na gjeti as pa mjete speciale të nevojshme.
Llafet e tepërta dhe akuzat e sajuara, avazi i përsëritur i mori era, njësoj si tymrat e makinave dhe ndotjen e ajrit, që e pastroi karantina. Ajo ç’ka ka rëndësi është rezultati, bilanci dhe arritja jonë pozitive përtej humbjes së jetëve. Asgjë, asnjëherë nuk është e përsosur, asnjë lider dhe asnjë qeveri. Që kur ka lindur shteti, nuk ka qenë i pagabueshëm.
Sidomos në kushte si këto, kur koha nuk pret. Po të ktheheshin mbrapsht, të gjithë të madhërishmit e kësaj bote, po të ngjalleshin edhe njëherë, me siguri do të gjenin të meta plot. Nëse do të kthehesha mbrapsht, nuk do t’u përgjigjesha më komentatorëve në faqen time në Facebook. Unë nuk di ta bëjë këtë luftë pa gjak dhe pa pasion. Dhe kjo për shumëkënd mund të duket arrogancë, mbase dhe është, nuk e di. Por ajo që di me siguri është se unë nuk vras, nuk vjedh, nuk shantazhoj, nuk shpif, nuk flej para të tjerëve, nuk zgjohem pas të tjerave”.
