Presidenti Ilir Meta përkujton sot Ditën e Eksodit Shqiptar, ku mbi 1 milionë shqiptarë u dëbuan nga Kosova.
Përmes një postimi në Facebook, Meta shpreh mirënjohjen ndaj popullit të Kukësit, Tropojës dhe Hasit të cilët i kanë mirëpritur ata në shtëpitë e tyre.
Kreu i shtetit ka shpërndarë edhe një video të 21 viteve më parë, ku mijëra banorë u dëbuan nga vendi i tyre, për shkak të gjenocidit dhe spastrimit etnik të regjimit të Millosheviçit.
Postimi i plotë:
Sot në Ditën e Eksodit Shqiptar, përkujtojmë vuajtjet, dhimbjet dhe sakrificat sublime të mbi 1 milion shqiptarëve, të cilët 21 vite më parë u dëbuan me dhunë nga Kosova martire, për shkak të gjenocidit dhe spastrimit etnik të regjimit kriminal të Millosheviçit!
Sot nderojmë edhe kujtimin e viktimave të pafajshme të luftës së Kosovës, fëmijët, gratë e të moshuarit e vrarë barbarisht, si edhe heronjtë dhe dëshmorët e rënë për lirinë e pavarësinë e saj.
Mirënjohje në veçanti për kontributin historik të popullit të Kukësit, të Tropojës dhe të Hasit, që edhe pse në kushte mjaft të vështira ekonomike dhe sociale, mikëpritën dhe mbajtën peshën kryesore të bujarisë e humanizmit gjatë këtij eksodi biblik.
